లోకాయతన పురోహితుని విఫలయత్నం

జాబాలి
ఏకాంక రూపకం
రచన: నార్ల వెంకటేశ్వరరావు
ప్రచురణ:
విశాలాంధ్ర పబ్లిషింగ్ హౌస్
విజయవాడ
పేజీలు: 80, వెల: రు.60/-
**
‘జాబాలి’ అనే ఆయన దశరథుని పురోహితులలో ఒకడు. మానసికంగా లోకాయతన వాది అయినా, లౌకికంగా ఆస్తికుడుగా, యజ్ఞయాగాదులలో నమ్మకం వున్న ఆధ్వర్యుడుగా వ్యవహరిస్తున్నవాడు. వశిష్ఠ మహర్షికి అనుయాయిలా ‘బూటక’ పాత్రధారిగా చరిత్ర నడుపుతూ వున్నవాడు. నార్ల వెంకటేశ్వరరావు వ్రాసిన ఇరవై పేజీల ఏకాంక రూపకం యిది. ఇరవై పేజీల నాటకానికి యాభయి పేజీల పీఠిక సమకూర్చడంలో రచయితకు ప్రత్యేక ప్రయోజనం వున్న ది. అది జనాభిప్రాయంలో పాతుకుపోయిన మూఢ సిద్ధాంతాలను ఎలాగయినా తార్కికంగా పరిహరింపచేయాలని. సంస్కృత రామాయణంలో లేని అనేక సన్నివేశాలు, సందర్భాలు ఎలా తరువాత ప్రచురణలలో ‘వాల్మీకం’గానే రూపుకట్టుకున్నాయో చూపించడంకోసం యింత పీఠిక అవసరం అయింది. మనం ఆదికావ్యం అనుకుంటున్న రామాయ ణం, వాల్మీకి తరువాత వచ్చిన కవులు తమతమ స్వంతభావాలను కూడా యిందుతో పొదిగి పుస్తకాన్ని అప్రమాణికం చేశారని. పరస్పర విరుద్ధమయిన విషయాలు రామాయణ శ్లోకాలలో కొల్లలుగా వున్నాయని సోదాహరణంగా చూపారు.
రూపకంలో ప్రధాన అంశం యేమంటే- రాము డు వనవాసం చేయకుండా రాజ్యాధికారం స్వీకరించి ప్రజలను ధార్మికంగా పరిపాలించాలని జాబాలి అనే లోకాయతన పురోహితుని అభిలాష. ఈ విషయాన్ని తనకు యింతకు ముందే తెలిసిన, వశిష్ఠులవారు చెప్పిన పరమరహస్యాన్ని రామునికి చెప్పి ఆయనను తన కోరికకు అనుగుణంగా తీర్చిదిద్దాలనే ప్రయ త్నం విఫలమయిపోవడం. తన అభిప్రాయాలతో రాముడిని మొదటినుంచి చికాకు పరుస్తూ, జాబాలి వశిష్ఠుడు వచ్చిన తరువాత కథను మలుపుతిప్పి తన నాస్తికతను పునఃప్రతిష్టితం చేసుకుంటాడు.
నార్లవారు ఈ ఏకాంక రూపకానికి సంస్కృత రామాయణంలోని అయోధ్యకాండకు చెందిన 108-109 సర్గల కథనాన్ని ఆధారంగా తీసుకున్నారు. జాబాలిని ‘మానవతావాది’గా రూ పొందించారు. ‘తమ విశ్వాసం కోసం కవులనాహ్వానించలేని ప్రాణాలు అర్పించలేని విస్మృత వర్గానికి చెందినవాడు జాబాలి’ అంటారు. (పే.57). రచన సరళంగా సాగి విషయాన్ని గంభీరంగా చదువరుల ముందుకు తీసుకువస్తుంది. తెలుగుపాఠకులందరూ తప్పనిసరిగా చదవవలసిన పుస్తకం యిది. కథ వేరు, చరిత్ర వేరు అన్న విషయం నిర్ధారణ చేసుకోవటానికి ఉపకరించే పుస్తకం. రామాయణం చారిత్రాత్మకం గ్రంథం కాదు, చక్కని కావ్యం అని తెలుసుకోవటానికి పీఠిక ఎంతగానో ఉపకరిస్తుంది.