పట్టు జారిపోతుందా?

హైదరాబాద్, అక్టోబర్ 3: తెదేపా అధినేత, ఏపి ముఖ్యమంత్రి చంద్రబాబునాయుడుకు పార్టీపై పట్టుతప్పుతోందా? పదేళ్లు కష్టపడి సాధించిన అధికారానికి ఎమ్మెల్యేలు, కొందరు మంత్రుల తీరుతో ప్రమాదం వచ్చి పడిందా? ఎమ్మెల్యేల అడ్డగోలు దోపిడీతో సొంత పార్టీనేతలే దెబ్బతింటున్నారా? కోస్తాలో పెరుగుతున్న కులముద్ర మిగిలిన కులాలను ఏకం చేస్తోందా? వైసీపీ నేతల చేరికలు నిజంగానే కొంప ముంచనున్నాయా?.. రెండున్నరేళ్లుగా కార్యకర్తల్లో బలంగా నాటుకున్న ఇలాంటి వాదన, వేదన నేపథ్యంలో నేటి నుంచి నాలుగురోజుల పాటు జరగనున్న తెదేపా శిక్షణ శిబిరాలకు ప్రాధాన్యం ఏర్పడింది.
ఇవి వాస్తవాలు చర్చించుకుని క్షేత్రస్థాయిలో కార్యకర్తలు ఎదుర్కొంటున్న సమస్యలకు పరిష్కారం చూపేందుకు అక్కరకొస్తాయా? లేక నాయకత్వాన్ని కీర్తించేందుకు పరిమితమవుతాయా? అన్న అంశంపై పార్టీ వర్గాల్లో చర్చ జరుగుతోంది.
పార్టీ కష్టకాలంలో ఉన్నప్పుడు ఆదరించిన ఉభయ గోదావరి, గుంటూరు, అనంతపురం జిల్లాల్లో కార్యకర్తల పరిస్థితి, ఇప్పుడు అధికారంలోకి వచ్చిన తర్వాత కూడా అదే విధంగా ఉందన్న ఆవేదన వ్యక్తమవుతోంది. పని చేసిన వారికి గుర్తింపు లేకపోగా, పార్టీ పదేళ్లు కష్టకాలంలో ఉన్నప్పుడు కనిపించని వారు, ఎన్నికల సమయంలో టికెట్లు తీసుకుని ఎమ్మెల్యే, మంత్రులుగా వచ్చి తమపై కర్ర పెత్తనం చేస్తున్నారన్న ఆగ్రహం ఉంది.
గుంటూరు, ప్రకాశం, కృష్ణా జిల్లాల్లో కొందరు ఎమ్మెల్యేలు, మంత్రులు సొంత పార్టీ నేతలకే ఎసరు పెడుతున్నారని క్వారీలు, వైన్‌షాపులు, రెస్టారెంట్ల వ్యాపారం చేసుకునే తమ నుంచి కూడా వాటాలు పిండుతున్నారంటున్నారు. గుంటూరు జిల్లాలో ఒక మంత్రి ప్రాతినిధ్యం వహిస్తున్న నియోజకవర్గంలో 14 క్వారీలుండగా, అందులో 11 కమ్మ వర్గానికి చెందిన పార్టీ నేతలవే.
అధికారంలోకి వచ్చిన తర్వాత సదరు మంత్రిగారు మైనింగ్ అధికారులపై ఒత్తిడి చేసి వాటిని మూయించారు. మంత్రిగారికి కొడుకు లాంటి వ్యక్తికి వాటిని తక్కువ ధరకు అమ్మేయమంటున్నారని, ప్రతి ఎన్నికల్లో సొంత డబ్బుపెట్టి పనిచేసే తమకు, పార్టీ అధికారంలోకి వస్తే ఇలాంటి చేదు అనుభవం ఎదురవుతుందని ఊహించలేదని వాపోతున్నారు. ఇదే మంత్రిగారి భార్య ప్రకాశం జిల్లాలోని క్వారీ దరఖాస్తుదారుడిని పిలిపించి అది తమకు స్వాధీనం చేయమని ఒత్తిడి చేస్తున్నారంటున్నారు.
గుంటూరు జిల్లాలో ఎక్కువ సార్లు గెలిచి, మంత్రి పదవి రాని ఒక ఎమ్మెల్యే, తన నియోజకవర్గంలోని క్వారీలను అధికారంలోకి వచ్చిన నెల రోజుల నుంచే కబ్జా చేసుకుని, అనధికార మైనింగ్ చేస్తున్నా అడిగే దిక్కు లేదంటున్నారు. జిల్లాలో పోలీసు నియామకాలన్నీ ఆయనకే అప్పగించారని, దానితో సాంబశివరావుకు డిజిపి పదవి రాకుండా ప్రయత్నించే స్థాయికి ఎదిగారంటున్నారు.
కొత్తగా ఎన్నికైన ఒక ఎమ్మెల్యే ప్రతిదానికి రేట్లు నిర్ణయించి, డబ్బులు ఇచ్చిన తర్వాతనే లెటర్లు స్వాధీనం చేయమని పీఏలను ఆదేశిస్తున్నారు. మరో మంత్రి భార్య దూకుడుకు పార్టీ కార్యకర్తలు హడలిపోతున్నారు. ఇంకో మంత్రి అవగాహనా రాహిత్యం, అహంకారంతో పార్టీ నేతలు దూరమయ్యే పరిస్థితి. ప్రకాశం జిల్లాలో పార్టీలో చేరిన ఒక ఎమ్మెల్యే తన నియోజకవర్గంలో మకుటంలేని మహారాజు. తన మాట వినలేదన్న కారణంతో ఇటీవల ఒక చిన్న దుకాణం చుట్టూ చెత్త పోయించారన్న విమర్శలున్నాయి. ఇసుకలో సోదరులిద్దరూ దన్నుకుంటు, పోలీసులను లెక్క లేకుండా మాట్లాడుతున్నా అడిగే దిక్కులేదు.
పార్టీని కష్టకాలంలో ఆదుకోవడంతోపాటు, ప్రాణాలు, ఆస్తులు కోల్పోయిన అనంతపురం జిల్లా కార్యకర్తలు పార్టీ అధికారంలోకి రాకముందే తమకు గౌరవం ఉండేదని భావిస్తున్నారు. ఒక్కరికీ పదవులివ్వకపోగా, సమస్యలు వినే నాథులు లేకుండా పోయారన్న ఆవేదన వ్యక్తమవుతోంది.
గతంలో సీనియర్లు తమ అభిప్రాయాలు నిర్మొహమాటంగా చెప్పేవారని, ఇప్పుడు వారంతా ఏదో ఒక ప్రయోజనం పొంది వౌనంగా ఉంటున్నందున పార్టీకి నష్టం జరుగుతోందంటున్నారు. బాబు ప్రతిపక్షనేతగా ఉన్నప్పుడు సీనియర్ల అభిప్రాయాలు వినేవారని, ఇప్పుడు అలాంటి వాతావరణం లేదంటున్నారు. కొత్తగా ఏడాదిన్నర నుంచి కోస్తాలో ఒక కులం పెత్తనం పెరిగిపోవడం మిగిలిన కులాల్లో అసంతృప్తి రగిలిస్తోంది. కీలక పోస్టింగులతోపాటు, అన్ని కాంట్రాక్టులూ వారికే దక్కుతున్నాయని, కొత్తగా పోస్టింగు తెచ్చుకున్న వారిని ఆరునెలలకు మించి పని చేయనీయడం లేదన్న ప్రచారం విస్తృతంగా ఉంది.
కొత్తగా కనిపిస్తున్న ఈ కుల ముద్రకు తెర దించకపోతే, దీనిని ప్రతిపక్షం సద్వినియోగం చేసుకోవడం ఖాయమని హెచ్చరిస్తున్నారు. ఎమ్మెల్యేలు గత ఎన్నికల్లో పెట్టిన ఖర్చుకు చక్రవడ్డీతో సంపాదించుకోవాలని భావిస్తున్నందుకే ఈ పరిస్థితి తలెత్తిందని, దీనికి తెరదించకపోతే పార్టీ పుట్టిమునిగిపోతుందంటున్నారు.
ఒకవైపు బాబు అవినీతి రహిత పాలన గురించి మాట్లాడుతుంటే, మరోవైపు ఎమ్మెల్యేలు బరితెగించి సంపాదనకు పాల్పడుతుంటే ప్రజల్లో ఎలాంటి సంకేతాలు వెళతాయని ప్రశ్నిస్తున్నారు.