కొత్త జిల్లాలతో తంటా?

హైదరాబాద్, నవంబర్ 7: కొత్త జిల్లాల ఏర్పాటుతో పట్ట్భద్రుల, ఉపాధ్యాయల నియోజకవర్గాల నుంచి శాసనమండలికి (కౌన్సిల్) పోటీ చేసే అభ్యర్థులకు తలనొప్పిగా మారింది. భవిష్యత్తులో పోటీ చేయవచ్చన్న భావనతో తమ నియోజకవర్గాల (జిల్లాల) పరిథిలో మంచి పరిచయాలు పెంచుకున్నారు. కానీ ముఖ్యమంత్రి కె. చంద్రశేఖర్ రావు తాజాగా 10 జిల్లాలను 31 జిల్లాలుగా మార్చడంతో జిల్లాల స్వరూపం మారింది. అయితే వచ్చే ఏడాది ఫిబ్రవరి, మార్చిలో పట్ట్భద్రుల, ఉపాధ్యాయ నియోజకవర్గాలకు ఎన్నికలు జరగనున్నాయి. జిల్లాల స్వరూపం మారినా, ఎన్నికల కమిషన్ వద్ద పాత నియోజకవర్గాల (జిల్లాల) ప్రకారమే ఓటింగ్ జరుగుతుంది. కాబట్టి వచ్చిన చిక్కేమి లేదని అధికారులు చెబుతున్నా, అభ్యర్థులు మాత్రం ఆందోళన వ్యక్తం చేస్తున్నారు. గతంలో మూడు జిల్లాల్లో పర్యటిస్తే సరిపోయేదని, ఇప్పుడు జిల్లాల సంఖ్య పెరగడంతో తాము పెరిగిన, అంటే కొత్తగా వెలిసిన జిల్లాల్లోకి వెళ్ళి ప్రచారం చేసుకోవాల్సి ఉంటుందని అంటున్నారు. లోగడ మూడు జిల్లాల పరిధి ఇప్పుడు తొమ్మిది జిల్లాలుగానో లేక తొమ్మిదిన్నర జిల్లాలకు విస్తరించింది. ఇప్పుడు అభ్యర్థులూ తమ నియోజకవర్గాల (అంటే జిల్లాల) పరిథి తెలుసుకుంటూ ప్రచారంలో ముందుకు వెళ్ళాల్సి ఉంటుంది. గతంలో ఉన్న ఒక జిల్లా ఇప్పుడు మరో జిల్లాలో కొంత భాగమైంది. కలగాపులగం కావడంతో చాలా జాగ్రత్తగా కొత్త జిల్లాల సంగతిని పక్కన పెట్టి, పాత జిల్లాల సరిహద్దులను దృష్టిలో పెట్టుకుని ఓటర్లైన పట్ట్భద్రులను, ఉపాధ్యాయులను కలిసి ప్రచారం చేసుకోవాల్సి ఉంటుంది. ఏదైనా మూడు జిల్లాలు చొప్పున ఉండే పట్ట్భద్రుల, ఉపాధ్యాయ నియోజకవర్గాలు ఇతర జిల్లాల్లో కలవడం వల్ల ప్రచారంలో చాలా అయోమయంగా ఉంటుందని అభ్యర్థులు ఆందోళన వ్యక్తం చేస్తున్నారు. నియోజకవర్గాల, జిల్లాల సరిహద్దులను తెలియజేస్తూ, సరిహద్దు గ్రామాల విషయంలో తగాదా లేకుండా, ఆ గ్రామాలు ఏ జిల్లాల పరిథిలోకి వస్తాయో రెవెన్యూ అధికారులు తేల్చాల్సి ఉంది.