చినబాబు చేతికి దక్కినవి పగ్గాలా? కష్టాలా?

ఎట్టకేలకు, కాంగ్రెస్ పార్టీకి డిఫ్యాక్టో బాస్‌గావున్న రాహుల్ భయ్యా అధికారికంగా ముళ్లకిరీటం ధరించాడు. 89 సెట్ల నామినేషన్లు పడ్డాయి. ఒక్కటైనా ఇంకొకరు ఫార్మాలిటీకి మరో నామినేషన్ వేస్తే బాగుండేది. కాని, 19 సంవత్సరాల తరువాత ఇందిరమ్మ కోడలు- సోనియమ్మకి ప్రసంగాలు చూసి చదివే యాతన తప్పింది. ప్రధానమంత్రి పదవి వదులుకున్న త్యాగమూర్తిగా వాసికెక్కిన రాజీవ్ గాంధీ భార్యరత్నం- ఇంచుమించు ఆ హోదాలోనే బండి లాక్కుంటూ వచ్చింది. బాగా ఆరోగ్యం చెడిపోయిన తరువాతగాని ఆమె కొడుకు చేతికి పగ్గాలు ఇవ్వదలచలేదు. ఆమె కుడిభుజం, నేస్తం, సచివుడు, సలహాదారుడు అయిన గుజరాతి అహమద్ పటేల్‌కి కూడా- తొల్లి, గద్దెమీద కూకున్న ప్రభుత్వాలు మంత్రి పదవి ఇస్తామని నాలుగుసార్లు ఆఫర్ వచ్చినా- వద్దని సోనియాగాంధీ లాగే త్యాగమూర్తి అయిపోయి ఆమెకు పొలిటికల్ కార్యదర్శిగా పనిచేశాడు. అతను పనిచేశాడో లేదో? కాంగ్రెస్ మాత్రం పని చెయ్యడం ఒగ్గేసింది. ఇవ్వాళ అతనికి బద్ధ శత్రువు అయిన తోటి గుజరాతి అమిత్ షా మీద కత్తులు నూరుతూ అక్కడే వున్నాడు. కాంగ్రెస్ పార్టీకి గుజరాత్‌లో గెలిస్తే-ముస్లిం మియా అహమ్మద్ పటేల్ ముఖ్యమంత్రి అంటూ పోస్టర్లు వెలిశాయి. దీనితో, వాటి ఖండన మండనలో మునిగి (తేలుతాడా?) వున్నాడు అక్కడ. ‘‘నాకెప్పుడూ అటువంటి దురుద్దేశ్యం లేదు, ముఖ్యమంత్రి అభ్యర్థిని కాదు’’ అని సంజాయిషీ ఇవ్వడమే అతను చేస్తున్న పని. గుజరాత్ పోలింగ్‌కు ముందు రాహుల్‌కి భుజకీర్తులు మాత్రమే వున్నాయి.. కానీ ఇవాళ చినబాబుకు సందడి సంబరం- జేజేధ్వానాలు లేకుండా నెత్తిన కిరీటం వచ్చింది. రాహుల్జి నామినేషన్లు వరుసగా సబ్మిట్ చేస్తున్నపుడు ప్రక్కన సోనియా మాత ఆడ లేదు- ‘అపర ఇందిరమ్మను నేనే’ అని సెల్ఫ్ డబ్బా కొట్టుకున్న ప్రియాంకా వాద్రా సైతం అక్కడ లేదు. ఆ హాలు గోడమీద నెహ్రూ బొమ్మ లేకపోతే మానె- మహాత్మాగాంధీ యొక్క ముక్కున వ్రేలేసుకున్న బొమ్మ లేదుట. అహమద్ పటేల్ లేడు- ఉపన్యాసం చూసి చదివే బాధ తప్పింది బ్రతుకు జీవుడా? అనుకున్నది కాబోలు- సోనియామాత అక్కడికి రాలేదు.
చాలా తేడా వుంది. తల్లికి కొడుకుకి- అమ్మ పుట్టిల్లు ఇటలీయే గాని రాహుల్ ఢిల్లీలోనే 1970 జూన్ 19న పుట్టాడు. నిజం చెప్పాలీ అంటే ఏమి భాగ్యం? ఏమి బాల్యం? నాయనమ్మ అంగరక్షకుల చేతిలో హతం కాగా, తండ్రి దారుణ హత్యకి గురి అయ్యాడు. సొంత పేరు కూడా చెప్పుకోకుండా అజ్ఞాతంలో ఉంటూ ఇంగ్లీషు దేశంలో మారుపేరుతో చదువుకున్నాడు. రెండు యుపిఏల హయాం అయింది. తండ్రి రాజీవ్ గాంధి దారుణంగా హత్యకి గురి అయినప్పటికీ, ప్రేమలో గెలుపు- ఇంటి దగ్గర విజయం, దేశాధిపత్యం లాంటివెన్నో రాజీవ్ అనుభవించాడు. కాని చినబాబుకి జీవితం కష్టాల పొట్లమే అయిపోయింది.
‘‘నాకో గాళ్‌ఫ్రెండ్ వుంది, స్పానిష్ అమ్మాయి- వెనిజుల్లాలో వుంటుంది’’ అని 2013 దాకా చెప్పేవాడు రాహుల్- కాని 2013లో జైపూర్‌లో కాంగ్రెస్ పార్టీ చింతన్ శిబిరం బ్రహ్మాండంగా జరిగింది. సోనియా మాత కాంగ్రెస్ పార్టీ కలిసి కార్యదర్శి సంకెళ్లు చేతికి తగిలించడంతో జీన్ ప్యాంట్లు, టీషర్టులకి గుడ్‌బై చెప్పేసి పైజామా జుబ్బాలోకి మారిపోయాడు ‘రాగా’. అదో చెత్త మలుపు.
వెనకటివన్నీ తవ్వి తలకెత్తుకుని వెక్కి వెక్కి ఏడిచే ఓపిక ఎవ్వరికీ లేదు ఇవ్వాళ- కాకపోతే మైనారిటీకి చెందినవాడికి- ‘గొప్ప ఆర్థికవేత్త’కి ప్రధానమంత్రి పదవి కట్టబెట్టేము అని నాడు జబ్బలు చరచుకున్నదీ పార్టీ- దేశ దౌర్భాగ్యం- పార్టీ భ్రష్టుపట్టడం- అప్పుడే మొదలైంది. డబ్బులు చెట్టుకి కాస్తాయా? అన్ని అడిగిన ప్రధానిగా పేర్గాంచిన సింగుగారు చిరునవ్వులు నవ్వినట్లు కూడా ఆ గుబురు గెడ్డంలోనుంచి ఎవరూ చూడలేదు. ఇందిరమ్మ హయాంలో కోటరీ వుండేది- పెద్ద బుర్రలు మాయలు పన్నాగాలు ఎరిగిన కొమ్ములు తిరిగిన వారెందరినో ఆమె సర్కస్ ఆడించింది. కానీ ఈ మనవడికి ఇందిరమ్మ గుడ్‌విల్- నలుగురు అస్మదీయుల్ని కూడా అందించలేకపోయింది. ‘నువ్వు అమ్మవా?’ అని సినిమా డైలాగు చెప్పేవాడేమో? పాపం లోపల లోపల కుర్రాడు.
‘ఆమెకి ట్రీట్‌మెంట్ అందుతోంది గానండి పార్టీకి చికిత్స చేసే మందులు మాత్రం లేవండయ్యా’ అనేవాడు విజయవాడలో ఓ కాంగ్రెస్ వీరాభిమాని. ఇందిరా కాంగ్రెస్ అంటేనే వెంటనే కోప్పడేవాడు.. నేను ఇందిరమ్మ కాంగ్రెస్ కాదు- పాత కాంగ్రెస్సు వాణ్ణి- ఇప్పుడున్నాది కాంగ్రెస్సే కాదు అనేవాడు. గతజల సేతుబంధనాల్ ఏమి ప్రొయోజనాల్? అంటారు ఈ పాత గాంధేయవాదులు. అదీ సంగతి- దేశానికి గాంధీ నేషనలిజం కావాలా? హిందుత్వ నేషనలిజం చాహియేనా? రాహుల్జీని అడిగితే - ఇవాళ నూతన కాంగ్రెస్సు అధ్యక్షునిగా ఏమి చెబుతాడు? కాంగ్రెస్ పార్టీ జీర్ణోద్ధారణ ఎలా చెయ్యాలో చెప్పండి.. అని ఎదురు అడుగుతాడు. ప్రధాని గద్దెనెక్కి దిగినంత మాత్రాన, హాయిగా సుఖజీవాశ్రమంలో కూర్చోనక్కరలేదు- మన్మోహన్జీ పార్టీ జీర్ణోద్ధారణ క్రియాశీలక కార్యక్రమాలు ముట్టుకోరాదని ఎక్కడా లేదు. రాహుల్జి ప్రణబ్ ముఖర్జీ- ఇంటికి వెళ్లి అశీస్సులు తీసుకున్నాడుట- అతను మాజీ రాష్టప్రతిగా క్రియాశీలక రాజకీయాలలోకి రారాదు కాని- ‘‘అబ్బీ! ఆనాడు నన్ను ప్రధాని కాకుండా నీ యమ్మ ఆమె ముఠా ఇద్దరూ కలిసి దగా చేయకుండా వుంటే ఇవాళ నీ చేతికి శిథిల మందిరం మిగిలేది కాదు- ఆమెకి హిందీ రాదు- కానీ నీ యమ్మ గొప్ప కుట్రదారు అని చెప్పి వుండాలి ముఖర్జీ సారు. దివాలాకోరు తండ్రి బిడ్డకి అప్పులు తిప్పలు వదిలిపోయినట్లు- సోనియా మాత నీకీ శిథిల మందిరం వదిలేసింది అనుంటాడు.
ఏమైనారు? పార్టీ హేమాహేమీలు? ఆఖరికి మణిశంకర్ అయ్యర్ కూడా లేడు? కొంచెం కొంచెంగా, సోకాల్డ్ బుర్రలు మార్చే పెద్దలు మళ్లీ వస్తారేమో?
చూడు బాబూ.. దిగ్విజయసింగ్ లాంటి వారి శల్య సారథ్యం నిన్ను పార్టీని కూడా ముంచింది. వాచాలత- పార్టీకి ఏమిచ్చింది? ఓడిపోయిన మహా పార్టీ తిరిగి పుంజుకోవడానికి అధ్యక్షురాలు శ్రీమతి సోనియా ఏమి చేసింది? అని అడిగే మొనగాడే లేడా? పార్టీలో? రెండువేల తొమ్మిదిలో యువరాజుగారు రంగంలో దిగి పెత్తనం అందుకునేసరికి ఇంత దీనంగా లేదు- రెండు వందల నాలుగు సీట్లున్నాయి. కాని రెండువేల పధ్నాలుగు నాటికి నలభై నాలుగు వెక్కిరించినట్లు మిగిలాయి. దిగ్విజయ్‌సింగ్ లాంటి ఓల్డ్ బండికూట్లు ఎక్కువైనారు- కరప్షన్, ఇంప్లేషను, భాగస్వామ్య పార్టీల సబటాజ్- ఇవి చాపక్రింద నీరులాగా పార్టీని తినేస్తూ వుంటే నైతిక బాధ్యత ఎవరిది? పార్టీకి అధ్యక్షురాలే కాదు సంకీర్ణపక్ష చైర్మన్ కూడా అయిన ఆమెది కాదా? ఎంత వద్దన్నా వేమన్నగారి పద్యం ఒకటి జ్ఞాపకం వస్తోంది క్షమించాలి- కోతి పట్టితెచ్చి పట్టు పుట్టము గట్టి చేరి కొండముచ్చులెల్ల కొలిచినయట్లు అన్న చందాన సోనియాని అడ్డం పెట్టుకుని ఎవరి పబ్బం వాళ్ళు గడుపుకున్నారు. చిన్నబాబు బలి అయిపోయాడు. ఓ ట్రైనింగు పాడూ వద్దా? బ్యాట్ పట్టుకుని దిగంగానే సెంచరీ కొట్టగలడా, ఎవడైనా? అధికారం ఆమెది- ప్రచార పగ్గాలు చేతబెట్టి కొడుకుని తోలేస్తే, యుపిలో 2007లోను 2012లను కూడా మటాష్.. బిహార్‌లో వైఫల్యం ముందే ఎదురు వచ్చింది. చినబాబుకి 2007లో అప్పగించిన యూత్ కాంగ్రెస్‌ను మాత్రం ఓ కొలిక్కి తీసుకురాగలిగాడు తప్ప పెద్ద ఎన్నికల రథాలను లాగలేకపోయాడు. రాను రాను వోటు శాతం కూడా ఇరవై శాతానికి పడిపోయింది. మునిగే పడవని చోద్యంగా చూశారు కాం.పా. సేన.
అగ్ర నాయకులూ, తింకు ట్యాంకులు చేయాల్సిన పని కావాలి ఇపుడు. కొత్త కార్యవర్గాన్ని ఎంపిక చేసుకోవాలి- ఇది కత్తిమీద సాము. పోతే, ఈ వారం గుజరాత్‌కే అంకితం కదా? కొత్త అధ్యక్షుని సలహాదారులు - పొలిటికల్ అడ్వైజర్ ఎవరు? సంక్రాంతి నాటికి ఎంపిక జరుగుతుంది అని రాహుల్ ‘నెల గంట’ పెట్టగానే, కార్యవర్గాన్ని ఏర్పాటు చేసుకుంటాడని.. అభిజ్ఞ వర్గాల భోగట్టా. యుపిలో భారీ ఎత్తున చినబాబులు ఇద్దరూ అఖిలేష్ రాహుల్ జంట తెగ తిరిగేశారు. కాని అక్కడ ఓ సన్యాసి- దుమ్ము దులిపేశాడు- సంసారి దుఖీ సన్యాసి సుఖీ అన్న సామెత రుజూ చేశాడు. చినబాబుకి అమ్మ సలహా లేదు. కాగా చిన్న యాదవుడికి తండ్రి డాడీ ములాయం స్ట్రోక్ కొట్టింది. అయితే, ఇక, యువరాజు కాదు రాజు కనుక- మొదట రాహుల్ డామేజి రిపేరుకు పూనుకోవాలి. ఇదేమి కాంగ్రెస్సు? అంటే- సోనియా కాంగ్రెస్సు అని ఏ తలమాసినవాడు అనడు కదా? మహాత్మాగాంధీ కాంగ్రెస్సా? అదెక్కడ? దేవాంతక గుజరాతి మాంత్రికుడు దామోదర్ దాస్ నరేంద్రుడు- ముందు గాంధీజీనే హైజాక్ చేసేశాడు - సర్దార్ వల్లభాయ్ గారిని కిడ్నాప్ చేసేశాడు- అమెరికా వెళ్లినా రష్యా వెళ్లినా ఏ దేశమేగినా అక్కడో గాంధీజీ బొమ్మని అలంకరించడమో ఆవిష్కరించడమో చేసేస్తూ వుంటే?
ఆఖరికి ఖద్దరుని కూడా దక్కనివ్వలేదు. రాట్నం పట్టుకుని తానె కేలండర్ మీద ఎక్కి కూర్చున్నాడు- నన్ను ఎవ్వరూ ఏమిహి చేయలేరు. నేను గాంధీజీ పటేల్జీల రాష్ట్రం గుజరాత్ బిడ్డని అంటూ వుంటే- ‘డామ్ నెహ్రూ’ ఉద్యమం ఒక చెంప - జై గాంధీ జై పటేల్ రెండో పక్క.. ఫినిష్! సోనియా గాంధీకి ఢిల్లీ పెద్దల వత్తాసు లేదు. ఒక్కక్షరం ముక్కా రాని, నిషానిని కూడా అప్పటికప్పుడు ప్రాక్టీసు చేసిన బిహారీ నారీ - పేడ - పిడకల తల్లి- లల్లూజీ శ్రీమతి రాబదడీ దేవిని గద్దెమీద కూర్చోబెట్టి-తను జైల్లోనే కూర్చుని గవర్నమెంటుని - దాణాసురుడు - పశుగ్రాసఘోటాలా నేరస్తుడు అయిన శ్రీమాన్ లల్లూ ప్రసాద్ యాదవ్ ఎలా నడిపించాడు? పార్టీని పరోక్షంగా కూడా కంట్రోల్ చెయ్యలేదా? ఇవాళ కూడా అతనికి ‘ప్రజాబేసు’ లేదా? అంచేత ప్రెసిడెంట్ ఆల్ ఇండియా నేషనల్ కాంగ్రెస్- అయిన రాహుల్ ‘‘అక్కా.. నువ్వు రా... అమ్మ నువ్వు చెప్పు’’ అని గాకుండా ప్రజల మనిషి కావాలి- అంటే, ముందు పాదయాత్ర చెయ్యాలి- మహాత్మాగాంధీ గారిని మళ్లీ తెచ్చుకోవాలి. గరీబీ హటావో, రోటీ కపడా మకాన్ లాంటి పాత చింతకాయ పచ్చడి స్లోగన్స్ పేలవు- ఇవాళ బిజిలీ, సడక్, పానీ - ప్లస్ హైఫైల నినాదాల్ చెల్లుతున్న రోజులివి. రోడ్లు పొల్యూషన్లు - ఇవి బాధలు, సెల్ఫీలు, కుల్ఫీలు జనాల హాబీలు. మతం గితం లేదు - ఆ మాటకొస్తే మన్మోహన్‌సింగ్ మంత్రివర్గంలో డజనుమంది నాస్తికులుండేవారు. వోటు హక్కు / ఆధార్‌కార్డ్ శ్రీ ప్రకాష్‌రాజ్‌కి ఇవ్వలేదా? నిర్మతస్తులకి కూడా రోటి కపడా ఉద్యోగం ఇవ్వరా? మనవాళ్లు? ప్రకాష్‌రాజ్‌లు వెండితెరకే పరిమితమైపోవాలి అంటే అర్జెంటుగా, రాహుల్ గాంధీ పాదయాత్ర చెయ్యాలి, జనాలమధ్యకి పోవాలి. గాంధీజీ ఐమీన్ మహాత్మాజీ పాదయాత్రనే ఆయుధంగా ఉపయోగించాడు. ‘‘దేశాన్ని చుట్టిరా బాబూ! పోయిన క్యాడర్ తిరిగి తెచ్చుకోవాలి- ఎలక్షన్ ఊకదంపుడు వేరు- ప్రజల సమక్షం వేరు- అమ్మకూచి కాదు భారతమ్మ కూచి కావాలి.
-టేక్ ఎ ‘రోడ్ మ్యాప్’ అండ్ గెట్ గోయింగ్! మిస్టర్ ప్రెసిడెంట్!