హైదరాబాద్, సెప్టెంబర్ 13: ముసురుతున్న వ్యాధులపై ప్రభుత్వం ఏం చర్యలు తీసుకుందో వివరించాలని హైకోర్టు ఆదేశించింది. గత ఏడాదితో పోలిస్తే డెంగ్యూ వ్యాధి సోకిన రోగుల సంఖ్య ఈ ఏడాది రెట్టింపు సంఖ్యలో ఉందని కారణాలను వివరించాలని హైకోర్టు పేర్కొంది. జీహెచ్‌ఎంసీ,రాష్ట్ర ఆరోగ్య శాఖ తీసుకున్న చర్యలపై హైకోర్టు అసంతృప్తి వ్యక్తం చేసింది.

విజయవాడ, సెప్టెంబర్ 13: రాష్ట్రానికి ప్రత్యేక హోదా సాధన కోసం ఉద్యమించిన వారిపై ప్రాసిక్యూషన్‌లో ఉన్న అన్ని కేసులను ఎత్తివేసేందుకు రాష్ట్ర ప్రభుత్వం నిర్ణయించింది. ఈ మేరకు సంబంధిత పబ్లిక్ ప్రాసిక్యూటర్లకు, అసిస్టెంట్ పబ్లిక్ ప్రాసిక్యూటర్లకు తగిన ఆదేశాలు జారీ చేయాలని డీజీపీని ఆదేశించింది. ఈ మేరకు శుక్రవారం ఉత్తర్వులు జారీ చేసింది.

న్యూఢిల్లీ, సెప్టెంబర్ 13: కర్నాటక కాంగ్రెస్ నాయకుడు డీకే శివకుమార్‌ను మరో నాలుగు రోజుల పాటు కస్టడీకి అప్పగించాలని ఎన్‌పోర్స్‌మెంట్ డైరెక్టరేట్ కోరింది. మనీ లాండరింగ్ కేసులో శివకుమార్ ఇప్పటికే గత తొమ్మిది రోజులుగా ఈడీ కస్టడీలో ఉన్నారు. తొమ్మిది రోజుల కస్టడీ పూర్తి కావడంతో ఈడీ శివకుమార్‌ను ఢిల్లీ కోర్టు ప్రత్యేక జడ్జి అజయ్‌కుమార్ కుహార్ ఎదుట ఈడీ హాజరు పరిచింది.

న్యూఢిల్లీ, సెప్టెంబర్ 13: ఎస్సీ, ఎస్టీ అట్రాసిటీ చట్టానికి సంబంధించి గతంలో ఇచ్చిన తీర్పుపై ముగ్గురు న్యాయమూర్తులతో కూడిన సుప్రీం కోర్టు ధర్మాసనం విచారణ చేపట్టనుంది. 2018 మార్చిలో సుప్రీం కోర్టు ఇచ్చిన తీర్పు చట్టంలోని కొన్ని అంశాలను నీరుగార్చేవిగా ఉన్నాయంటూ కేంద్రం రివ్యూ పిటిషన్ దాఖలు చేసింది.