తిరుపతి, సెప్టెంబర్ 29: మనిషి ప్రాణం విలువ రూ. 2,200లు. ఇదేంటనుకుంటున్నారా.. తిరుపతి పుణ్యక్షేత్రంలోని ప్రైవేట్ బస్టాండ్ సమీపంలో గత 9 రోజుల క్రితం తమిళనాడుకు చెందిన ముగ్గురు నేరస్థులు కడప జిల్లాకు చెందిన ఓ యువకుడిని గొంతుకోసి చంపిన ఉదంతమే ఇందుకు నిదర్శనం. ఈస్ట్ పోలీస్ స్టేషన్ పరిధిలో జరిగిన ఈ హత్యకు సంబంధించి పోలీసులు చాకచక్యంగా ఛేదించారు.

స్టేషన్ ఘన్‌పూర్, సెప్టెంబరు 29: ప్రమాదవశాత్తు రైలు కిందపడి గుర్తు తెలియని వ్యక్తి మృతి చెందిన సంఘటన మండల కేంద్రంలోని రైల్వే గేటులో శనివారం రాత్రి జరిగింది. శనివారం రాత్రి పది గంటలకు ఖాజీపేట నుండి సికింద్రాబాదుకు బయలుదేరిన ధానాపూర్ ఎక్స్‌ప్రెస్‌లో ప్రయాణిస్తున్న గుర్తు తెలియని వ్యక్తి ఘన్‌పూర్ రైల్వేగేట్ సమీపంలోకి రాగానే ప్రమాదవశాత్తు రైలుబోగి నుండి జారి కిందపడడంతో అక్కడిక్కడే మృతి చెందాడు.

మునగాల, సెప్టెంబర్ 29: మండలకేంద్రంలోని నాగార్జునసాగర్ ఎడమ కాల్వ పరిధిలో స్ధానిక హెడ్ రెగ్యూలేటర్ వద్ద శనివారం మహిళ మృతదేహాం లభ్యమైంది. పోలీసులు తెలిపిన వివరాల ప్రకారం మిర్యాలగూడ పట్టణం సీతారాంపురంకు చెందిన తడకమళ్ల విజయమ్మ(58) కుటుంబ ఆర్ధిక ఇబ్బందుల కారణంగా రెండు రోజుల క్రితం ఇంటి నుండి బయటకు వచ్చింది. ఈ నేపధ్యంలో ఆమె సాగర్ కాల్వలో దూకి ఆత్మహత్యకు పాల్పడగా మృతదేహాం ఇక్కడ లభ్యమైనట్లు తెలిపారు.

మిర్యాలగూడ టౌన్, సెప్టెంబర్ 29: మిర్యాలగూడ మండలం ఐలాపురం గ్రామ శివారులో శనివారం మిర్యాలగూడ పట్టణానికి చెందిన శివాని స్కూల్ బస్సు మోటార్ సైకిల్‌ను ఢీ కొనడంతో బైక్‌పై వెళ్తున్న తేజావత్ సిద్ధునాయక్ (22) అక్కడికక్కడే మరణించగా, బానోతు సాయిరాం తీవ్ర గాయాలకు గురయ్యారు. గాయపడ్డ సాయిరాంను స్థానిక ప్రభుత్వ ఏరియా ఆసుపత్రిలో చేర్పించి చికిత్స జరుపుతున్నారు.