వికారాబాద్, సెప్టెంబర్ 15: ప్రమాదవశాత్తు రైలు నుంచి కింద పడి యువకుడు మృతిచెందిన సంఘటన వికారాబాద్ రైల్వే పోలిస్‌స్టేషన్ పరిధిలో జరిగింది. వికారాబాద్ మున్సిపల్ పరిధిలోని లక్ష్మీనగర్ తాండకు చెందిన శివ(24) పాండ్యనాయక్, పద్మమ్మల కొడుకు. ఇటీవలే ఎస్‌ఏపీ కళాశాలలో డిగ్రీ పూర్తిచేశాడు. ఆదివారం వీఆర్‌వో పరీక్ష సైతం రాయాల్సి ఉంది.

రాజమహేంద్రవరం, సెప్టెంబర్ 15: శాంతిభద్రతల పరిరక్షణ, ప్రజలు, ప్రభుత్వ ఆస్తులను పరిరక్షించే ఒక పోలీసు అధికారి వాహనం చోరీకి గురి కావడం చర్చనీయాంశంగా మారింది. త్రీటౌన్ పోలీసుస్టేషన్‌లో ఎస్‌ఐగా విధులు నిర్వర్తిస్తున్న ఎం వెంకటేశ్వరరావుకు చెందిన బుల్లెట్ శనివారం సాయంత్రం చోరీకి గురైంది. ఆయన పుష్కరాలరేవు సమీపంలో విధులు నిర్వహిస్తుండగా ఆయన బుల్లెట్‌ను గుర్తుతెలియని వ్యక్తులు అపహరించుకుపోయారు.

బొండపల్లి, సెప్టెంబర్ 15: కారు ఢీకొన్న సంఘటనలో మహిళ మృతి చెందిన సంఘటన బోడసింగిపేట గ్రామంలో చోటుచేసుకొన్నది. సంఘటన వివరాలు ఇలా ఉన్నాయి. గ్రామానికి చెందిన బోడసింగి ఆదిలక్ష్మి(53) తెల్లవారుజామున బహిర్భూకివెళ్లి తిరిగి ఇంటికి వచ్చేందుకు రోడ్డు దాటుతుండగా విజయనగరం నుండి గజపతినగరం వైపు వస్తున్న కారు ఆదిలక్ష్మిని డీకొట్టింది. దీంతో ఆదిలక్ష్మి అక్కడికక్కడే మృతి చెందింది.

ద్వారకాతిరుమల, సెప్టెంబర్ 14: నీటి తొట్టెలో పడి ఓ చిన్నారి మృతిచెందింది. ఈ ఘటన మండలంలోని రామన్నగూడెం పంచాయతీ మెట్టగూడెంలో శుక్రవారం ఉదయం చోటుచేసుకుంది. స్థానికుల కథనం ప్రకారం గ్రామానికి చెందిన పెచ్చెటి శివ, దుర్గ దంపతులకు ముగ్గురు పిల్లలు. అందులో ఆఖరి పాప రూప (18నెలలు) శుక్రవారం ఇంటి ఆవరణలో ఆడుకుంటోంది. ఉన్నట్టుండి తొట్టె వైపునకు వెళ్లిన చిన్నారి ప్రమాదవశాత్తూ అందులో పడిపోయింది.