రుద్రంగి, జూలై 7: రుద్రంగి మండల మానాల గ్రామానికి చెందిన తూం గణేశ్(25) అనే యువకుడు విద్యుత్ షాక్‌తో శనివారం మృతి చెందాడు. తన వ్యవసాయ క్షేత్రంలోచెట్టు కొడుతుండగా, కొమ్మలు విద్యుత్ తీగలకు తగిలి షాక్ రాగా, అక్కడికక్కడే మృతి చెందినట్లు కుటుంబ సభ్యులు తెలిపారు. ఖరీఫ్ సీజన్‌లో వ్యవసాయ పనుల్లో నిమగ్నమైన రైతు గణేశ్ విద్యుత్ షాక్‌తో మృతి చెందటంతో గ్రామంలో విషాదం చోటు చేసుకుంది.

మహబూబ్‌నగర్, జూలై 7: ఈత కొట్టడానికి స్నేహితులతో కలిసి వెళ్లిన ఎంబీబీఎస్ విద్యార్థి సుమంత్ (19) చెరువులో మునిగి మృతి చెందాడు. ఈ సంఘటన శనివారం సాయంత్రం మహబూబ్‌నగర్ జిల్లా కేంద్రంలో జరిగింది. వివరాల్లోకి వెళ్తే.. జిల్లా కేంద్రంలోని భగీరథ కాలనీకి చెందిన సుమంత్ పట్టణంలోని ఎస్వీఎస్ మెడికల్ కాలేజీలో ఎంబీబీఎస్ రెండో సంవత్సరం చదువుతున్నాడు.

హైదరాబాద్, జూలై 7: చిట్టీల పేరుతో ఎంతోమందిని నమ్మించి రూ.2 కోట్ల మొత్తానికి మోసం చేసిన కేసులో ఇద్దరిని అరెస్టు చేసినట్లు సిసిఎస్ పోలీసులు తెలిపారు. లింగాల విజయమ్మ, ఎక్కుర్తి మనోహర్, మరికొందరు కలిసి చిట్టీల పేరుతో మోసానికి పాల్పడ్డారు. 1995 నుంచి వీరు చిట్టీల వ్యాపారం చేస్తూ సొమ్ము దుర్వినియోగం చేశారు. ప్రజల సొమ్ముతో వీరు స్ధిరాస్తులు కూడగట్టినట్లు సిసిఎస్ అధికారులు గుర్తించారు.

తడ, జూలై 7: ఆంధ్ర-తమిళనాడు సరిహద్దు గ్రామాల్లో గత కొంతకాలం నుంచి ఎర్రచందనం అత్యధికంగా చెన్నైకు స్మగ్లింగ్ చేస్తున్న నేపథ్యంలో అక్రమ రవాణాను నివారించేందుకు అటు తమిళనాడు, ఇటు ఆంధ్ర పోలీసులు ప్రత్యేక బృందాలను ఏర్పాటు చేశారు.