కడప, మే 31: ఇళ్లలో ఒంటరిగా ఉన్న మహిళలను హత్యచేసి వారి వద్ద బంగారు నగలు దోచుకున్న ముగ్గురు సభ్యుల హంతక ముఠాను కడప జిల్లా పోలీసులు గురువారం అరెస్టు చేశారు. 2013లో ఈ ముఠా కడప జిల్లా ప్రొద్దుటూరులో వరుసుగా ముగ్గురు మహిళలను హత్యచేసి నగలు దోచుకుంది. ముఠాసభ్యుల్లో అబ్దుల్ కలాం, షేక్ మహ్మద్ ఇషాక్, గౌస్ లాజమ్ ఉన్నారు.

న్యూఢిల్లీ, మే 31: కాంగ్రెస్ సీనియర్ నేత పీ చిదంబరం ఐఎన్‌ఎక్స్ మీడియా అవినీతి కేసులో విచారణకు గైర్హాజరయ్యారు. గురువారం ఆయన సీబీఐ కోర్టుకు హాజరు కావల్సి ఉంది. చిదంబరం ను ప్రశ్నించాల్సి ఉండగా కోర్టుకు రాలేదు. అయితే చిదంబరం గైర్హాజరుకు సంబంధించి సంబంధిత అధికారుల నుంచి ఎలాంటి ప్రకటన వెలువడలేదు. ఐఎన్‌ఎక్స్ మీడియా అవినీతికి సంబంధించి మే 15న సీబీఐ ఎఫ్‌ఐఆర్ నమోదు చేసింది.

న్యూఢిల్లీ, మే 31: ‘దేవుడు వరం ఇచ్చినా పూజారి కనికరించలేదు’ అని అంటుంటారు. అలాంటిదే ఒకటి వెలుగుచూసింది. ఓ నిందితుడికి సుప్రీం కోర్టు బెయిల్ మంజూరు చేసినా, కింది కోర్టు అతడిని విడుదల చేయలేదు. గురువారం ఈ అంశం సుప్రీం కోర్టు విచారణకు వచ్చింది. దీనిపై తీవ్రంగా స్పందించిన సర్వోన్నత న్యాయస్థానం మెజిస్టీరియల్ కోర్టుపై తీవ్ర ఆగ్రహం వ్యక్తం చేసింది.

నెల్లూరు, మే 31: ఎర్రచందనం అక్రమ రవాణాకు సహకరిస్తూ కొన్ని సందర్భాల్లో స్మగ్లింగ్‌కు పాల్పడుతున్న తమిళనాడు, కర్నాటక రాష్ట్రాలకు చెందిన ఆరుగురు సభ్యుల ముఠాను నెల్లూరు జిల్లా టాస్క్ఫోర్స్ పోలీసులు గురువారం అరెస్ట్ చేశారు. వారి వద్ద నుంచి సుమారు రూ.1.30 కోట్ల విలువైన సొత్తును స్వాధీనం చేసుకున్నారు.