ఎన్టీఆర్, సుకుమార్ కాంబినేషన్‌లో శ్రీ వెంకటేశ్వర సినీ చిత్ర ఎల్‌ఎల్‌పి పతాకంపై బి.వి.ఎస్.ఎన్.ప్రసాద్ రూపొందించిన ‘నాన్నకు ప్రేమతో’ చిత్రానికి సంబంధించిన షూటింగ్ పూర్తిచేశారు. సంక్రాంతి కానుకగా విడుదల చేయడానికి నిర్మాత సన్నాహాలు చేస్తున్నారు.

ప్రముఖ నటుడు మహేష్‌బాబు హీరోగా తెరకెక్కుతున్న ‘బ్రహ్మోత్సవం’ చిత్రం ఊటీలో షూటింగ్ పూర్తిచేసుకుంది. ఈ వారంనుండి విజయవాడలో మరో షెడ్యూల్ జరపడానికి సన్నాహాలు చేస్తున్నారు. శ్రీకాంత్ అడ్డాల దర్శకత్వంలో తెరకెక్కుతున్న ఈ చిత్రంలో ముగ్గురు అందాల భామలు సమంత, కాజల్, ప్రణీతలు హీరోయిన్లుగా నటిస్తున్నారు. ఫ్యామిలీ ఎంటర్‌టైనర్‌గా తెరకెక్కుతున్న ఈ చిత్రం విజయవాడ నేపథ్యంలో సాగుతుందని తెలిసింది.

లేటెస్టుగా విడుదలైన ‘బెంగాల్ టైగర్’ చిత్రంతో మంచి జోరుమీదున్నాడు రవితేజ. ఈ సినిమా తరువాత ఆయన మూడు సినిమాల్లో నటించేందుకు సన్నాహాలు జరుగుతున్నాయి. ఇప్పటికే ‘ఎవడో ఒకడు’ షూటింగ్ జరుగుతోంది. దాంతోపాటు చక్రి దర్శకత్వంలో మరో చిత్రం కూడా సెట్స్‌పైకి రానుంది. దీంతోపాటు ‘స్వామిరారా’ ఫేం సుధీర్‌వర్మతో ఓ సినిమా చేసేందుకు గ్రీన్‌సిగ్నల్ ఇచ్చాడు.

నిరంజన్ దేశ్‌పాండే, దిశా పాండే జంటగా చంద్రమోహన్ దర్శకత్వంలో తెరకెక్కిన చిత్రం ‘బొంబాయి మిఠాయి’. కన్నడలో రూపొందిన ఈ చిత్రాన్ని తెలుగులోకి భీమవరం టాకీస్ పతాకంపై తుమ్మలపల్లి రామసత్యనారాయణ నిర్మిస్తున్నారు. ఈ చిత్ర ట్రైలర్ ఆవిష్కరణ కార్యక్రమం హైదరాబాద్‌లో జరిగింది. ఈ కార్యక్రమంలో పాల్గొన్న ప్రముఖ గాయకుడు గజల్ శ్రీనివాస్ ట్రైలర్ ఆవిష్కరించారు.