చేతన్ చీను, సునయన జంటగా మధు గోపు దర్శకత్వంలో రూపొందిస్తున్న చిత్రం ‘పెళ్లికిముందు ప్రేమకథ’. ఈ చిత్రానికి సంబంధించిన సెన్సార్ కార్యక్రమాలు పూర్తిచేశారు. జూన్ 9న విడుదలకు సిద్ధమైంది. ఈ సందర్భంగా దర్శకుడు మాట్లాడుతూ వైవిధ్యమైన కథ, కథనంతో పెళ్లికిముందు ప్రేమకథ ఎలా ఉంటుందో చిత్రంలో చెబుతున్నామని, రొమాన్స్ ఎంటర్‌టైన్‌మెంట్ సమపాళ్లలో ఉండేలా చిత్రీకరించామన్నారు.

రవితేజ హీరోగా నటిస్తున్న తాజా చిత్రం ‘టచ్ చేసి చూడు’. విక్రమ్ సిరికొండ దర్శకత్వంలో తెరకెక్కుతున్న ఈ చిత్రంలో రవితేజ పోలీస్ పాత్రలో కనిపించనున్నాడు. ప్రస్తుతం షూటింగ్ జరుపుకుంటున్న ఈ చిత్రం జూన్ 5నుంచి మరో భారీ షెడ్యూల్‌కి సన్నాహాలు జరుపుతున్నారు. ఈ షెడ్యూల్‌ని 20 రోజులపాటు పాండిచ్చేరిలో జరుపుతారట. ఓ ఫైట్‌తోపాటు కీలక సన్నివేశాల చిత్రీకరణ జరపనున్నట్టు సమాచారం.

బాహుబలి-2 చిత్రంతో అనుష్కకు దక్షిణాదిలో వున్న పాపులారిటీకన్నా ఉత్తరాదిలో మరింత పెరిగింది. రీసెంట్‌గా విడుదలైన ఈ సినిమాలో ఆమె చేసిన దేవసేన పాత్ర కీలకమైనది కావడంతో బాలీవుడ్ ఆమెపై కథనాలను అల్లుకుంటోంది. అయితే, అనుష్క కొత్త సినిమాలకు గ్రీన్‌సిగ్నల్ ఇవ్వలేదు. తనకు తగిన పాత్రల కోసం ఎదురు చూస్తోందట. బాలీవుడ్‌లో తనకు పెరుగుతున్న క్రేజ్ దృష్ట్యా, హాట్ హాట్ ఫొటో షూట్స్ చేయడానికి కూడా సిద్ధమవుతోంది.

గంటా రవి, మాళవికా మీనన్ జంటగా, శ్రీ లక్ష్మీ వెంకటేశ్వర ఆర్ట్ క్రియేషన్స్ పతాకంపై జయంత్ సి పరాన్జి దర్శకత్వంలో కె.అశోక్‌కుమార్ రూపొందిస్తున్న చిత్రం ‘జయదేవ్’. ఈ చిత్రానికి సంబంధించిన నాలుగవ పాట ‘ఓ నవ్వులో ఇంతుందా.. ఇంతుందా’ విడుదల చేశారు.