న్యూఢిల్లీ, ఆగస్టు 14: స్వాతంత్య్ర దినోత్సవ వేడుకల కోసం దేశ రాజధాని ఢిల్లీలో విస్తృత ఏర్పాట్లు చేశారు. చారిత్రాత్మక ఎర్రకోటపై నుంచి ప్రధాని నరేంద్రమోదీ జాతిని ఉద్దేశించి ప్రసంగించనున్నారు. ఈ సందర్భంగా నగరమంతా రెప్పవాల్చని నిఘా ఉంచారు. ఎర్రకోట పరిసరాల్లో కట్టుదిట్టమైన భద్రతా ఏర్పాట్లు చేశారు. కీలక, సమస్యాత్మక ప్రాంతాల్లో సాయుధ బలగాలను దించారు.

రాయపూర్: ఛత్తీస్‌గఢ్ గవర్నర్ బలరామ్‌జీ దాస్ టాండన్ (90) మంగళవారంనాడు కన్నుమూశారు. గత కొంత కాలంగా అనారోగ్యంతో బాధపడుతున్న ఆయన ఈరోజు పరిస్థితి క్షీణించటంతో రాయపూర్ అంబేద్కర్ ఆసుపత్రికి తరలించారు. అక్కడ చికిత్స పొందుతూ మృతిచెందారని రాజభవన్ అధికారులు వెల్లడించారు.

కాన్పూర్: జనవరిలో జరుగబోయే కుంభమేళకు ముందే గంగానదిని ప్రక్షాళన చేస్తామని కేంద్రమంత్రి నితిన్ గడ్కరీ తెలిపారు. ఆయన మీడియాతో మాట్లాడుతూ ఈమేరకు కేంద్రం, యూపీ ప్రభుత్వాలు నిధులు మంజూరుచేస్తాయని తెలిపారు.కేంద్రం 1700 కోట్ల రూపాయలు మంజూరుచేస్తుందని చెప్పారు. అలహాబాద్ నుంచి వారణాసి వరకు 40 మంది ప్రయాణీకులు ప్రయాణించేందుకు వీలుగా ఎయర్‌బోట్ సర్వీసులు ప్రారంభిస్తామని తెలిపారు.

న్యూఢిల్లీ: రాగల 48 గంటలలో ఐదు రాష్ట్రాలలో భారీ వర్షాలు కురుస్తాయని కేంద్ర వాతావరణ శాఖ వెల్లడించింద. కేరళ,తమిళనాడు, కర్ణాటక, ఉత్తరాఖండ్, హిమాచల్‌ప్రదేశ్‌లలో భారీ వర్షాలు కురుస్తాయని, అలాగే ఈదురు గాలులు వీస్తాయని వాతావరణ శాఖ శాస్తవ్రేత్త మృత్యుంజయ మహోపాత్ర వెల్లడించారు. అల్పపీడనం బలపడితే ఉభయ తెలుగు రాష్ట్రాలలోనూ వర్షాలు కురుస్తాయని వెల్లడించారు.