న్యూఢిల్లీ, జూన్ 10: అమర్‌నాథ్ యాత్రికులకు భద్రత నిమిత్తం 22,500 మంది అదనపు పారామిలిటరీ బలగాలు కావాలని జమ్ము-కశ్మీర్ పోలీసులు కోరారు. అమర్‌నాథ్ యాత్ర కొనసాగే దారి పొడవునా బహుళ అంచలతో కూడిన భద్రతను ప్రభుత్వం కల్పిస్తోంది. అమర్‌నాథ్ యాత్ర ఈ నెల 28న ప్రారంభమవుతుంది. పరమశివుడు మంచు లింగాకృతిలో వెలిసే అమరనాథ్ గుహ దక్షిణ కశ్మీర్‌లోని హిమాలయాల్లో ఉన్నది.

జమ్ము, జూన్ 10: భద్రతా బలగాల నైతిక స్థైర్యాన్ని దెబ్బతీసే చర్యలు తీసుకోబోమని కేంద్ర మంత్రి జితేంద్ర సింగ్ అన్నారు. ఇక కేంద్ర సంయుక్త కార్యదర్శుల నియామకాలపై ఆయన స్పందిస్తూ, అందుబాటులో ఉన్న అన్ని వనరులనుంచి మరింత ప్రతిభావంతులకు అవకాశం కల్పించడమే ప్రభుత్వ ప్రధాన ఉద్దేశమన్నారు. రోహింగ్యాలకు అక్రమంగా ఆధార్ లేదా ఓటింగ్ కార్డులు అందించిన అధికార్లపై కఠిన చర్యలు తీసుకుంటామన్నారు.

న్యూఢిల్లీ, జూన్ 10: దేశ రాజధాని ఢిల్లీలో సత్యదేవని కల్యాణం ఆదివారం అంగరంగ వైభవంగా జరిగింది. గోల్ మార్కెట్‌లో ఉన్న తిరుమల తిరుపతి దేవస్థానం వారి ధ్యాన మందిరంలో అన్నవరం దేవస్థానం ఆధ్వర్యంలో సత్యదేవుని కల్యాణం అశేష భక్తజన వాహిన మధ్య కనులవిందుగా జరిగింది. శనివారం ఇదే ప్రాగణంలో శ్రీ సత్యనారాయణ స్వామివారి వ్రతం నిర్వహించారు.

న్యూఢిల్లీ/ హైదరాబాద్/ పట్నా, జూన్ 8: జేఈఈ ఫలితాలను ఆదివారం కాన్పూర్ ఐఐటీ ప్రకటించింది. మొత్తం 360 మార్కులకు 350 మార్కులు సాధించిన పంచకుల విద్యార్థి ప్రణవ్ గోయల్ ప్రథమ ర్యాంకు సొంతం చేసుకున్నాడు. ఇక రెండో ర్యాంకును సాహిల్ జైన్, మూడో ర్యాంకును కైలాష్ గుప్తాలు సాధించారు. బాలికల్లో 318 మార్కులతో మీనాల్ పరేఖ్ అగ్రస్థానంలో నిలిచారు.