చండీగఢ్, జూన్ 3: పంజాబ్, హర్యానా రాష్ట్రాల్లో రైతుల ఆందోళన ఉధృతమైంది. వరుసగా మూడోరోజు కూడా రైతులు తమ పంటలను రోడ్డుపైన పారేసి నిరసన వ్యక్తం చేశారు. ఈ రెండు రాష్ట్రాల్లో ఆందోళన హింసాత్మకం కాకుండా పోలీసులు ముందస్తు చర్యలు తీసుకున్నారు. గిట్టుబాటు ధరలు లేక రైతులు కూరగాయలను రోడ్డుపారేస్తే, మరో వైపు ఉత్తరాది పట్టణాల మార్కెట్లలో కూరగాయల ధరలు అమాంతం పెరిగాయి.

న్యూఢిల్లీ, జూన్ 3: అమెరికా రాజకీయాలను తెలుగువారు శాసించే స్థాయికి ఎదగాలని కేంద్రీయ హిందీ సమితి సభ్యుడు యార్లగడ్డ లక్ష్మీప్రసాద్ పిలుపునిచ్చారు. అమెరికాలో జరిగిన తెలుగు మహాసభల ముగింపు కార్యక్రమంలో అమెరికా తెలుగు సంఘం (ఆటా), తెలంగాణ తెలుగు సంఘం (టాటా) సంయుక్తంగా యార్లగడ్డకు జీవితకాల సాఫల్య పురస్కారాన్ని ప్రదానం చేశాయి.

తూత్తుకుడి, జూన్ 3: తూత్తుకుడి స్టెరిలైట్ ఫ్యాక్టరీ ఘటనపై సిబిఐ చేత విచారణ జరిపించాలని సిపిఎం పార్టీ తమిళనాడు ప్రభుత్వాన్ని డిమాండ్ చేసింది. ఈ ఫ్యాక్టరీని మూసివేయాలని కోరుతూ ఆందోళన చేస్తున్న ప్రజలపై పోలీసులు కాల్పులు జరపగా, 13 మంది మరణించారని ఆ పార్టీ ప్రధాన కార్యదర్శి సీతారాం ఏచూరి తెలిపారు. ఈ ఫ్యాక్టరీని వెంటనే మూసివేయించాలని ఆయన కోరారు.

న్యూఢిల్లీ, జూన్ 3: దేశంలో వివిధ రాష్ట్రాల గవర్నర్లు, లెఫ్టినెంట్ గవర్నర్ల రెండు రోజుల సదస్సు ఈ నెల 4,5 తేదీల్లో రాష్టప్రతి భవన్‌లో జరుగుతుంది. సోమ, మంగళవారాల్లో జరిగే ఈ సదస్సులో స్వచ్ఛ్ భారత్, అంతరంగిక భద్రత అంశాలపై చర్చిస్తారు. జాతీయ స్థాయి 49వ గవర్నర్ల సదస్సు సందర్భంగా రాష్టప్రతి రాంనాథ్ కోవింద్ ప్రసంగిస్తారు. 1949లో గవర్నర్ల తొలి సదస్సు రాష్టప్రతి భవన్‌లో జరిగింది.