బెంగళూరు: కర్నాటక ఎన్నికలు జరుగుతున్న వేళ మోదీ రెండు రోజుల పాటు నేపాల్ పర్యటన జరపటం పట్లకాంగ్రెస్ పార్టీ ఆక్షేపణ తెలిపింది. మోదీ నేపాల్ పర్యటనలో ముక్తినాథ్, పశుపతి ఆలయాలను దర్శించుకోవటం కర్నాటక ఓటర్లను ప్రభావితం చేయటమేనని కాంగ్రెస్ ప్రధాన కార్యదర్శి అశోక్ గెహ్లాట్, కాంగ్రెస్ సీనియర్ నేత మల్లిఖార్జున ఖర్గే పేర్కొన్నారు. మోదీ ఎన్ని జిమ్మిక్కులు చేసినా గెలుపు కాంగ్రెస్‌దేనని అన్నారు.

నేపాల్‌: భారత ప్రధాని నరేంద్ర మోదీ నేపాల్‌ పర్యటన రెండో రోజు కొనసాగుతోంది. శనివారం మోదీ ముక్తినాథ్‌ ఆలయాన్ని సందర్శించి ప్రత్యేక పూజలు నిర్వహించారు. అనంతరం కాఠ్‌మాండూ చేరుకొని అక్కడి పశుపతినాథ్‌ ఆలయాన్ని సందర్శించారు. భారత్‌ సాయంతో నేపాల్‌లో చేపట్టిన పలు అభివృద్ధి పనులను ప్రధాని మోదీ సమీక్షించనున్నారు.

న్యూఢిల్లీ: ఆర్జేడీ నాయకుడు దీనా గోపేను శనివారం ఉదయం పాట్నాలో కొందరు గుర్తు తెలియని దుండగులు కాల్చి చంపారు. దీనా గోపే సతీమణి గతంలో పాట్నా డిప్యూటీ మేయర్‌గా పనిచేశారు. ఓ ఇంట్లో పెళ్లి వేడుకకు హాజరై ఇంటికి తిరిగి వస్తుండగా ఆయన హత్యకు గురైనట్టు పోలీసులు వెల్లడించారు.

బెంగళూరు: కర్ణాటక ఎన్నికల పోలింగ్‌ ప్రశాంతంగా కొనసాగుతోంది. ఉదయం 7 గంటలకు ప్రారంభమైన పోలింగ్‌ సాయంత్రం 6 గంటల వరకు జరగనుంది. 5 గంటల సమయానికి రాష్ట్రవ్యాప్తంగా 64శాతం పోలింగ్‌ నమోదైనట్లు ఈసీ అధికారులు వెల్లడించారు. కర్ణాటక అసెంబ్లీలో మొత్తం 224 స్థానాలున్నాయి. వీటిలో 222 స్థానాలకే ఎన్నికలు జరుగుతున్నాయి. 58,008 పోలింగ్ కేంద్రాలను ఏర్పాటు చేశారు.