న్యూఢిల్లీ : ఆంధ్రప్రదేశ్‌కు ప్రత్యేక హోదా ప్రకటించడంతో పాటు విభజన హామీలన్నీ నెరవేర్చాలని డిమాండ్‌ చేస్తూ తెలుగుదేశం ఎంపీలు పార్లమెంటు ప్రాంగణంలో ఆందోళన చేపట్టారు. పార్లమెంటు ఉభయసభలు ప్రారంభానికి ముందు గాంధీ విగ్రహం ఎదుట ప్లకార్డులు చేతబూని ఆందోళనలో పాల్గొన్నారు. చిత్తూరు ఎంపీ శివప్రసాద్‌ దోబీ వేషధారణలో ఆందోళనలో పాల్గొన్నారు.

రాంచీ : జార్ఖండ్‌లోని లతేహర్ జిల్లాలో ఎదురుకాల్పులు జరిగాయి. సెరెన్‌దాగ్ అటవీప్రాంతంలో పోలీసులు, సీఆర్పీఎఫ్ బలగాలు కలిసి కూంబింగ్ నిర్వహిస్తుండగా మావోయిస్టులు తారసపడ్డారు. దీంతో పోలీసులకు, మావోయిస్టులకు మధ్య హోరాహోరీగా కాల్పులు జరిగాయి. ఈ కాల్పుల్లో ఐదుగురు మావోయిస్టులు హతమయ్యారు. ఘటనాస్థలి నుంచి మావోయిస్టుల మృతదేహాలతో పాటు మూడు ఏకే 47 రైఫిల్స్‌ను స్వాధీనం చేసుకున్నారు.

జైపూర్/్భపాల్, ఏప్రిల్ 3: సోమవారం కొన్ని దళిత సంఘాల ఆధ్వర్యంలో జరిగిన ఆందోళనకు నిరసనగా మంగళవారం దేశంలోని కొన్ని ప్రాంతాల్లో అల్లర్లు చోటుచేసుకున్నాయి. రాజస్థాన్‌లో ఐదువేలమంది, సిట్టింగ్, మాజీ ఎమ్మెల్యేల ఇళ్లను తగులబెట్టారు. వీరిద్దరూ దళితులే కావడం విశేషం. కాగా మధ్యప్రదేశ్‌లో నిన్న అల్లర్లలో గాయపడిన వారిలో మరో ఇద్దరు మరణించడంతో ఇప్పటివరకు మరణించిన వారి సంఖ్య 11కు చేరింది.

న్యూఢిల్లీ, ఏప్రిల్ 3: వైకాపా పన్నిన రాజకీయ ఉచ్చుల్లో చిక్కుకున్న తెలుగుదేశం తమ పార్టీపై అర్థం పర్థం లేని ఆరోపణలు చేస్తోందని బీజేపీ ఆంధ్రప్రదేశ్ శాఖ అధ్యక్షుడు, లోక్‌సభ సభ్యుడు హరిబాబు, ఎంపీలు గోకరాజు గంగరాజు, జీవీఎల్ నరసింహారావు ఆరోపించారు. ఈ ముగ్గురూ మంగళవారం విలేఖరులతో మాట్లాడుతూ- వైకాపాకు బీజేపీ చేరువ అవుతోందంటూ తెలుగుదేశం చేస్తున్న ఆరోపణల్లో ఎంతమాత్రం నిజం లేదన్నారు.