హైదరాబాద్: గవర్నర్ ప్రసంగం సందర్భంగా జరిగిన ఘటనపై శాసనమండిలోనూ కాంగ్రెస్ సభ్యులపై వేటు పడింది. వీరి సస్పెన్షన్‌ను మంత్రి కడియం శ్రీహరి ప్రతిపాదించగా డిప్యూటీ చైర్మన్ నేతి విద్యాసాగర్‌ ఆమోదం తెలిపారు. బడ్జెట్‌ సమావేశాలు ముగిసే వరకు మండలి నుంచి షబ్బీర్ అలీ, పొంగులేటి సుధాకర్ రెడ్డి, సంతోష్, దామోదర్‌రెడ్డి, ఆకుల లలిత, కోమటి రెడ్డి రాజగోపాల్ రెడ్డి సస్పెండ్ చేస్తున్నట్లు ప్రకటించారు.

ఢిల్లీ: విభజన హామీలు, ప్రత్యేక హోదా కోరుతూ పార్లమెంటు ఆవరణలో తెలుగుదేశం, వైసీపీ, కాంగ్రెస్ ఎంపీలు మంగళవారం ఆందోళన చేపట్టారు. ప్ల కార్డులను చేతబూనిన ఎంపీలు నినాదాలు ఇస్తూ ఆందోళన నిర్వహించారు. పార్లమెంటు బడ్జెట్ సమావేశాలు ప్రారంభం అయిన రోజు దగ్గర్నుంచి ఎంపీలు ఆందోళనలు చేస్తున్న సంగతి తెలిసిందే.

డెహ్రాడూన్‌: ఉత్తరాఖండ్‌లో ప్రయాణికులతో వెళ్తున్న ఓ బస్సు అదుపుతప్పి లోయలో పడింది. ఈ ఘటనలో 10 మంది మృతిచెందారు. మంగళవారం ఉదయం అల్మోరా ప్రాంతం నుంచి నైనిటాల్‌ జిల్లాలోని రామ్‌నగర్‌కు వెళ్తున్న ఓ ప్రయాణికుల బస్సు తోటమ్‌ సమీపంలో లోయలో పడిపోయింది. ప్రమాద సమయంలో బస్సులో డ్రైవర్‌ సహా 24 మంది ప్రయాణికులు ఉన్నారు. ఈ ప్రమాదంలో ఇప్పటివరకు 10 మంది మృతిచెందినట్లు పోలీసులు తెలిపారు.

న్యూఢిల్లీ, మార్చి 12: కాంగ్రెస్ సీనియర్ నేత శశిథరూర్ భార్య సునంద పుష్కర్ కేసు కొత్త మలుపుతిరిగింది. సునంద పుష్కర్‌ది హత్యేనంటూ ఓ రహస్య నివేదిక వెల్లడించింది. ఆమెను ఎవరు చంపిందీ విచారణలో తెలిసిందని, దర్యాప్తు అధికారుల వద్దా కచ్చితమైన సమాచారం ఉందంటూ ఓ వార్తా సంస్థ పేర్కొంది. సునంద పుష్కర కేసులో మొదటి నుంచీ మిస్టరీ కొనసాగుతున్న సంగతి తెలిసిందే.