జొర్హాట్, ఫిబ్రవరి 15: అస్సాంలో గురువారం ఘోర ప్రమాదం జరిగింది. ఓ మైక్రోలైట్ హెలికాప్టర్ కూలిపోయన ఘటనలో ఇద్దరు భారత వైమానిక దళ ఉద్యోగులు మృతి చెందారు. రోజువారీ శిక్షణలో భాగంగా వెళ్తున్న వైరస్ ఎస్‌డబ్ల్యూ 80 చిన్న హెలికాప్టర్ కూలిపోయింది. జోర్హాట్ ఎయిర్‌బేస్ నుంచి టైకాఫ్ తీసుకున్న తరువాత మధ్యాహ్నం సమయంలో ఈ దుర్ఘటన చోటుచేసుకుందని అధికారులు వెల్లడించారు.

భోపాల్, ఫిబ్రవరి 15: మధ్యప్రదేశ్‌లో అధికార బీజేపీ ప్రభుత్వానికి వ్యతిరేకంగా భోపాల్ బాధిత సంఘాలు ఏకమవుతున్నాయి. త్వరలో జరగనున్న రెండు అసెంబ్లీ ఉప ఎన్నికల్లో బీజేపీకి వ్యతిరేకంగా ప్రచారం చేయాలని భోపాల్ గ్యాస్ బాధిత సంఘాలు ప్రకటించాయి. భోపాల్ గ్యాస్ విషాద బాధితులకు పరిహారం ఇప్పించడం, వారి సమస్యలు పరిష్కరించడంతో బీజేపీ ప్రభుత్వం ఘోరంగా విఫలమైందని సంఘాలు ధ్వజమెత్తాయి.

ఇటానగర్, ఫిబ్రవరి 15: దేశంలో 50 కోట్ల మంది ప్రజలకు ప్రయోజనం కలిగించే ‘ఆయుష్మాన్ భారత్ యోజన’ పథకాన్ని ఉద్యమ తరహాలో అమలు చేస్తామని ప్రధాని నరేంద్రమోదీ అన్నారు. ఈ పథకం వల్ల నాణ్యమైన, చౌకగా వైద్యసేవలు అందుబాటులోకి వస్తాయని, ఆరోగ్యరంగంలో సమూల మార్పులకు ఇది నాంది పలుకుతుందని ఆయన చెప్పారు. ప్రభుత్వ నిధులతో నిర్వహించే పథకాల్లో ‘ఆయుష్మాన్’ ప్రపంచంలోనే అతి పెద్దదిగా నిలవబోతోందని ఆయన అన్నారు.

న్యూఢిల్లీ: కృష్ణ, గోదావరి జల బోర్డుల పరిధిని నిర్ధారించే అంశంపై ఆంధ్రా, తెలంగాణ రాష్ట్రాల మధ్య తలెత్తిన విభేదాలకు పరిష్కారం కుదరలేదు. కేంద్ర జల వనరుల శాఖ కార్యదర్శి యూపీ సింగ్ గురువారం ఆంధ్రా, తెలంగాణ నీటి పారుదల శాఖ అధికారులు, బోర్డు అధికారులతో సమావేశమై వాటి పని తీరును సమీక్షించారు. ఈ సమావేశంలో బోర్డుల పరిధిని నిర్ధారించే అంశంపై ఇరు పక్షాలు వాదన వినిపించాయి.