న్యూఢిల్లీ, నవంబర్ 28: కేరళ లవ్ జిహాదీ కేసులో సుప్రీం కోర్టు నిర్ణయాన్ని బాధిత మహిళ తండ్రి కెఎం అశోకన్ హర్షించారు. సుప్రీం కోర్టు తీర్పు తమకు ఎంతో ఊరట నిచ్చిందని మంగళవారం అతడు వ్యాఖ్యానించాడు. తన కుమార్తె హదియా మెడిసిన్ విద్యను అభ్యసించడానికి ధర్మాసనం అనుమతి ఇవ్వడంపై అశోకన్ ఆనందం వ్యక్తం చేశాడు. హదియాను గృహనిర్బంధం చేసినట్టు వచ్చిన ఆరోపణలను అతడు తీవ్రంగా ఖండించాడు.

రష్యాలో పర్యటిస్తున్న హోంమంత్రి రాజ్‌నాథ్ సింగ్ మంగళవారం ఆ దేశ రక్షణ శాఖ మంత్రి వ్లాదిమిర్ పుఖోవ్‌తో సమావేశమయ్యారు. ఈ సందర్భంగా పలు ఒప్పందాలు కుదుర్చుకున్నారు.

న్యూఢిల్లీ, నవంబర్ 28: ‘ఒక దేశానికి ప్రధానినన్న విషయం నరేంద్ర మోదీ మరచినట్టున్నారు. ఎన్నికల ప్రచారాల్లో స్వోత్కర్షలు తప్ప, అసలు విషయం మాట్లాడటం లేదు’ అని ఆర్థిక శాఖ మాజీ మంత్రి చిదంబరం విరుచుకుపడ్డారు. గత ఎన్నికల ప్రచారాల్లో మోదీ హామీ ఇచ్చిన ‘అచ్చే దిన్’ కోసం 42 నెలలుగా దేశ ప్రజలు ఎదురు చూస్తున్నారని, అలాంటి మంచి రోజు మాత్రం కనుచూపుమేర కనిపించటం లేదని ఎద్దేవా చేశారు.

పాట్నా, నవంబర్ 28: ఆసుపత్రిలో పురుడుపోసుకున్న తల్లి.. బిల్లు కడితేనే గానీ డిశ్చార్జి చేయని వైద్యులు.. ఆ డబ్బుల కోసం బిచ్చమెత్తుతున్న ఆమె కొడుకు - ఇలాంటి సన్నివేశాలు సాధారణంగా సినిమాల్లో చూస్తుంటాం. ఇలాంటి ఘటనే పాట్నాలో నిజ జీవితంలో జరిగింది. బిచ్చమెత్తుకుంటున్న బాలుడు స్థానిక మీడియా కంటబడటంతో ఈ ఘటన వెలుగుచూసింది. అనంతరం ఓ ఎంపీ జోక్యం చేసుకోవడంతో ఆ బాలింతకు ఆసుపత్రి నుంచి విముక్తి లభించింది.