శ్రీనగర్, ఆగస్టు 7: జమ్ము కాశ్మీర్‌లో పాకిస్తాన్ నుంచి భారీ చొరబాటు యత్నాన్ని భద్రతాదళాలు తిప్పికొట్టాయి. మాచిల్ సెక్టార్‌లో సోమవారం పెద్ద సంఖ్యలో పాకిస్తాన్ ఉగ్రవాదులు వాస్తవాధీనరేఖ వెంబడి భారత భూభాగంలోకి చొరబడేందుకు ప్రయత్నాలు చేశారు. ముందుగా పెద్ద ఎత్తున ఆయుధ సామగ్రితో చొరబడటానికి ప్రయత్నించారు. వాస్తవాధీన రేఖ వెంబడి అనుమానాస్పద కదలికలను గుర్తించిన భద్రతాబలగాలు వెంటనే అప్రమత్తమయ్యాయి.

లక్నో, ఆగస్టు 7: సమాజ్‌వాది పార్టీలో కొనసాగటం ఇష్టం లేనివాళ్లు నిరభ్యంతరంగా పార్టీ వదిలి వెళ్లిపోవచ్చని ఆ పార్టీ అధ్యక్షుడు, ఉత్తరప్రదేశ్ మాజీ ముఖ్యమంత్రి అఖిలేశ్ యాదవ్ స్పష్టం చేశారు. ఎవరూ ఎలాంటి సంజాయిషీలు కూడా ఇవ్వకుండా వెళ్లిపోవచ్చని ఆయన అన్నారు. ముగ్గురు ఎస్పీ ఎమ్మెల్సీలు ఇటీవల పార్టీకి రాజీనామా చేసి బిజెపిలో చేరిన నేపథ్యంలో ఆయన సోమవారం ఈ వ్యాఖ్యలు చేశారు.

తిరువనంతపురం, ఆగస్టు 6: కేరళలో రాజకీయ హింసాకాండకు అధికార సిపిఎం పార్టీయే కారణమని కేంద్ర మంత్రి అరుణ్ జైట్లీ తీవ్రస్వరంతో ధ్వజమెత్తారు. ప్రత్యర్థి పార్టీ కార్యకర్తలను నిర్మూలించేందుకు సిపిఎం తన కార్యకర్తలను వినియోగించుకుంటోందని ఆదివారం నాడిక్కడ జరిగిన ఓ సంతాపసభలో జైట్లీ అన్నారు.

న్యూఢిల్లీ/బెర్న్, ఆగస్టు 6: స్విస్ ఖాతాల్లో ఉన్న సమాచారాన్ని అందుకునేందుకు మార్గం సుగమమైంది. భారత్‌తో సమాచార మార్పిడికి స్విట్జర్లాండ్ ప్రభుత్వం సానుకూలత వ్యక్తం చేసింది. భారత్‌లో డాటా సెక్యూరిటీ, రహస్య సమాచార చట్టాలు ఆ దేశంతో సమాచార మార్పిడి ఒప్పందం చేసుకోవటానికి అనుకూలంగా ఉన్నాయని స్విట్జర్లాండ్ పేర్కొంది.