బెంగళూరు, జూలై 18: పరప్పన అగ్రహార సెంట్రల్ జైల్లో అన్నాడిఎంకె (అమ్మ) పార్టీ అధినేత్రి వికె శశికళకు భారీ ఎత్తున ముడుపులు తీసుకొని ప్రత్యేక సదుపాయాలు కల్పిస్తున్నారంటూ వచ్చిన ఆరోపణలపైన, అలాగే జైల్లో చోటు చేసుకొంటున్న ఇతర అక్రమాలపైన దర్యాప్తు జరపడానికి కర్నాటక ప్రభుత్వం రిటైర్డ్ ఐఏఎస్ అధికారి వినయ్ కుమార్‌ను నియమించింది.

న్యూఢిల్లీ, జూలై 18: తెలంగాణకు చెందిన సీనియర్ కాంగ్రెస్ నాయకుడు, రాజ్యసభ సభ్యుడు ఎంఏ ఖాన్ మరోసారి కాంగ్రెస్ పార్లమెంటరీ పార్టీ విప్‌గా నియమితులయ్యారు. కాంగ్రెస్ అధ్యక్షురాలు సోనియాగాంధీ ఈ నియామకం చేసినట్లు రాజ్యసభలో ప్రతిపక్షం నాయకుడు గులాం నబీ ఆజాద్ ప్రకటించారు. ఏంఏ ఖాన్ నాలుగేళ్ల నుండి కాంగ్రెస్ పార్లమెంటరీ పార్టీ విప్‌గా పనిచేస్తున్నారు. ఆయన పదవీకాలం సోమవారంతో ముగిసింది.

కోహిమా, జూలై 18: మైనార్టీలో పడ్డ నాగాలాండ్ ముఖ్యమంత్రి షుర్హోజిలి లిజిత్సు ప్రభుత్వ భవితవ్యం బుధవారం తేలబోతోంది. బలపరీక్ష ను ఎదుర్కోవాలంటూ గవర్నర్ పిబి ఆచార్య జారీ చేసిన ఆదేశంలో జోక్యం చేసుకోవాల్సిన అవసరం లేద ని గౌహతి హైకోర్టు కోహిమా బెంచి న్యాయమూర్తి ఎల్‌ఎమ్ జమీర్ మంగళవారం స్పష్టం చేశారు. దీనిపై స్టే ఇవ్వాలంటూ లిజిత్సు దాఖలు చేసిన పిటిషన్‌ను తిరస్కరించారు.

న్యూఢిల్లీ, జూలై 18: ఆంధ్రప్రదేశ్‌లోని భోగాపురంతోపాటు దేశంలోని వివిధ రాష్ట్రాల్లో మొత్తం పద్దెనిమిది గ్రీన్ ఫీల్డ్ అంతర్జాతీయ విమానాశ్రయాల నిర్మాణానికి కేంద్ర పౌరవిమానయాన శాఖ మంగళవారం ఆమోద ముద్ర వేసింది. కేంద్ర విమానయాన శాఖ మంత్రి అశోక్‌గజపతి రాజు ఒక ప్రకటనలో ఈ విషయం తెలిపారు. వీటిలో భోగాపురంతోపాటు మరో ఆరు గ్రీన్‌ఫీల్డ్ అంతర్జాతీయ విమానాశ్రయాలకు సైట్ క్లియరెన్స్ అనుమతి కూడా లభించింది.