జమ్ము, జూలై 15: విదేశాంగ మంత్రిత్వ శాఖకు చెందిన లెటర్ హెడ్లను ఫోర్జరీ చేసి వైష్ణోదేవి ఆలయానికి వెళ్లడానికి హెలికాప్టర్ టికెట్లు పొందిన వ్యక్తిని పోలీసులు అరెస్టు చేశారు. నిందితుడు సందీప్ విదేశాంగ మంత్రిత్వ శాఖకు చెందిన సుష్మా స్వరాజ్ పేరుతోనున్న లెటర్ హెడ్లను ఫోర్జరీ చేసి వైష్ణోదేవి ఆలయానికి వెళ్లేందుకు మంత్రి కోటా కింద ఇచ్చే హెలికాప్టర్‌లో ప్రయాణించేందుకు టికెట్లను పొందాడు.

న్యూఢిల్లీ, జూలై 15: ఉపరాష్టప్రతి పదవికి పోటీచేసే అభ్యర్థి పేరును బిజెపి అధినాయకత్వం ఆదివారం ప్రకటించనున్నది. ప్రధాన మంత్రి నరేంద్ర మోదీ అధ్యక్షతన జరిగే బిజెపి పార్లమెంటరీ బోర్డు సమావేశంలో ఉపరాష్టప్రతి పదవికి అభ్యర్థిని ఎంపిక చేస్తారు. ఆ వెంటనే ఎన్‌డిఏ నాయకులు సమావేశమై ఆ అభ్యర్థి పేరుకు ఆమోదముద్ర వేస్తారు.

డార్జిలింగ్, జూలై 15: ప్రత్యేక గూర్ఖా ఉద్యమాలతో డార్జిలింగ్ పర్వత ప్రాంతం శనివారం హోరెత్తిపోయింది. భారీ భద్రత మధ్య ర్యాలీలు మిన్నంటాయి. వరసగా 31రోజూ హింసాత్మక సంఘటనలు చోటుచేసుకున్నాయి. గూర్ఖా జనముక్తి మోర్చా (జిజెఎం) పిలుపుమేరకు నిరవధిక సమ్మె కొనసాగుతోంది. ఉద్రిక్తత పరిస్థితులు ఉన్నప్పటికీ ఎక్కడా హింసాత్మక ఘటనలు జరిగినట్టు సమాచారం లేదు.

న్యూఢిల్లీ, జూలై 15: జమ్మూకాశ్మీర్‌లో శాంతి భద్రతలు, అమర్‌నాథ్ యాత్రికులకు రక్షణ వంటి కీలక అంశాలపై కేంద్ర హోమ్‌మంత్రి రాజ్‌నాథ్ సింగ్‌తో ముఖ్యమంత్రి మెహబూబా ముఫ్తీ శనివారం ఇక్కడ చర్చించారు. అరగంట సేపుజరిగిన సమావేశంలో జమ్మూకాశ్మీర్‌లోని తాజా పరిస్థితులను రాజ్‌నాథ్‌కు వివరించినట్టు అధికార వర్గాలు వెల్లడించారు.