చెన్నై, మే 1: డిఎంకె అధినేత ఎం.కరుణానిధి ఆరోగ్య పరిస్థితి స్థిమితంగానే ఉందని ఆయన కుమారుడు, పార్టీ కార్యనిర్వాహక అధ్యక్షుడు ఎంకె.స్టాలిన్ సోమవారం వెల్లడించారు. వచ్చేనెలలో 94వ జన్మదినోత్సవాన్ని జరుపుకోనున్న కరుణానిధి అనారోగ్య సమస్యల కారణంగా గత ఏడాది అక్టోబర్ నుంచి బహిరంగ కార్యక్రమాలకు దూరంగా ఉంటున్న విషయం తెలిసిందే.

న్యూఢిల్లీ, ఏప్రిల్ 30: టర్కీ అధ్యక్షుడు రెసెప్ తయ్యిప్ ఎర్డోగన్ రెండు రోజుల భారత పర్యటనకు వచ్చారు. ఆదివారం రాత్రి ఆయన న్యూఢిల్లీ చేరుకున్నారు. రెండు దేశాల ద్వైపాక్షిక సంబంధాలపై ప్రధానమంత్రి నరేంద్ర మోదీతో ఆయన సోమవారం భేటీ అవుతారు. అణు ఇంధన సరఫరా దేశాల బృందంలో భారత సభ్యత్వం, కౌంటర్ టెర్రరిజం, వ్యాపార వాణిజ్య సహకారంపై ఇద్దరు నేతలు చర్చిస్తారు.

న్యూఢిల్లీ, ఏప్రిల్ 30: గడ్చిరోలి కోర్టు తీర్పుతో జీవిత ఖైదు శిక్ష అనుభవిస్తున్న ఢిల్లీ యూనివర్శిటీ ఫ్రొఫెసర్ జి.ఎన్ సాయిబాబాను వెంటనే విడుదల చేయాలని ప్రజాసంఘాలు డిమాండ్ చేశాయి. ఢిల్లీలోని జంతర్ మంతర్ వద్ద వివిధ ప్రజాసంఘాలు సాయిబాబా ఆరోగ్య కారణాల దృష్ట్యా మెరుగైన వైద్యసేవల కోసం వెంటనే ఆయనకు బెయిల్ మంజూరు చేసి విడుదల చేయాలని ప్రభుత్వాన్ని డిమాండ్ చేస్తూ నిరసన తెలిపాయి.

న్యూఢిల్లీ, ఏప్రిల్ 30: ఆసియాలో అతి వేగంగా మిలటరీ అవసరాలు మారుతున్న నేపథ్యంలో ఏ క్షణంలోనైనా యుద్ధానికి సన్నద్ధంగా ఉండాలని భారత వాయుసేన తన సైన్యాన్ని ఆదేశించింది. ఒక వేళ యుద్ధం వస్తే పాకిస్తాన్‌తో కనీసంగా పది రోజులు, చైనాతో 15రోజుల పాటు తలపడేందుకు అన్నివిధాలా సన్నద్ధం కావాలని వౌఖికంగా ఉత్తర్వులు వెళ్లాయి.