ముంబై, ఫిబ్రవరి 26: ప్రఖ్యాత బాలీవుడ్ నటుడు షారుఖ్‌ఖాన్ ‘యశ్ చోప్రా నేషనల్ మెమోరియల్ అవార్డ్’ను అందుకున్నారు. శనివారం ముంబైలో కన్నుల పండువగా జరిగిన కార్యక్రమంలో షారుఖ్ ఖాన్‌కు టి.సుబ్బిరామిరెడ్డి ఈ అవార్డును అందజేశారు. మహారాష్ట్ర గవర్నర్ సిహెచ్ విద్యాసాగర్‌రావు, ప్రముఖ నటి రేఖ, శతృఘ్న సిన్హా, మాధురీ దీక్షిత్, జయప్రద, పద్మినీ కొల్హాపురి తదితరులు ఈ సందర్భంగా షారుఖ్ ఖాన్‌ను ఘనంగా సత్కరించారు.

మదురై, ఫిబ్రవరి 26: తమిళనాడులో ఆదివారం సాయంత్రం జరిగిన ఓ బోటు ప్రమాదంలో తొమ్మిది మంది యాత్రికులు దుర్మరణం చెందారు. ట్యుటికోరన్ జిల్లా మనపాడ్ సమీపంలో వీరు ప్రయాణం చేస్తున్న పడవ తలకిందులు కావటంతో ఈ దుర్ఘటన జరిగింది. రంగంలోకి దిగిన సహాయ బృందాలు పదిమందిని రక్షించగలిగాయి. మిగతావారికోసం గాలింపు జరుగుతోంది.

ముంబయి, ఫిబ్రవరి 25: బృహన్ముంబయి మున్సిపల్ కార్పొరేషన్‌కు ఇటీవల జరిగిన ఎన్నికల్లో ఏ పార్టీకి స్పష్టమైన మెజారిటీ రాని విషయం తెలిసిందే. అయినప్పటికీ మేయర్ పదవి తమ పార్టీకే దక్కుతుందని అతి పెద్ద పార్టీగా అవతరించిన శివసేన ధీమా వ్యక్తం చేసింది. మద్దతుకోసం తాము కాంగ్రెస్ పార్టీని సంప్రదిస్తున్నట్లు వచ్చిన వార్తలను ఆ పార్టీ నాయకుడు, రాజ్యసభ సభ్యుడు సంజయ్ రౌత్ తోసిపుచ్చారు.

అంబేద్కర్‌నగర్ (యూపీ), ఫిబ్రవరి 25: ఉత్తరప్రదేశ్ ఎన్నికల్లో సమాజ్‌వాదీ పార్టీ, కాంగ్రెస్‌ల మధ్య ఎన్నికల పొత్తు రెండు అవినీతి కుటుంబాల మధ్య ఒప్పందంగా బిజెపి అధ్యక్షుడు అమిత్ షా అభివర్ణించారు. ఈ ఎన్నికలు రాజకీయ పార్టీల మధ్య జరుగుతున్న ఎన్నికలు కాదని, రాష్ట్ర భవిష్యత్‌ను నిర్ణయించేవని శనివారం ఇక్కడ వ్యాఖ్యానించారు.