న్యూఢిల్లీ, జనవరి 13: దేశ వ్యాప్తం గా వివిధ హైకోర్టుల్లో తీవ్రమైన న్యాయమూర్తుల కొరత వల్ల పెద్ద మొత్తంలో కేసులు పెండింగ్‌లో ఉన్నాయి. 24 హైకోర్టుల్లో కలిపి మొత్తం 40.54 లక్షల కేసులు అపరిష్కృతంగా ఉన్నాయి. 24 హైకోర్టులు సుమారు 44 శాతం న్యాయమూర్తుల కొరతతో నడుస్తున్నాయి.

కోల్‌కతా, జనవరి 13: కోల్‌కతాలో శనివారం ఆర్‌ఎస్‌ఎస్ చీఫ్ మోహన్ భగవత్ పాల్గొనే కార్యక్రమం నిర్వహణకు కోల్‌కతా హైకోర్టు అనుమతి ఇచ్చింది. నగరం మధ్యలోని బ్రిగేడ్ పరేడ్ మైదానంలో మధ్యాహ్నం 2 గంటలనుంచి సాయంత్రం 6 గంటల వరకు జరిగే ఈ కార్యక్రమాన్ని కొన్ని ఆంక్షలతో నిర్వహించుకోవచ్చని న్యాయమూర్తి జస్టిస్ జయమాల్యో బాగ్చి చెప్పారు. ఈ కార్యక్రమానికి హాజరయ్యే వారి సంఖ్య 4 వేలకు మించకూడదనేది ఆ ఆంక్షల్లో ఒకటి.

న్యూఢిల్లీ, జనవరి 13:ఉత్తర ప్రదేశ్‌లో అధికార సమాజ్‌వాది పార్టీ ఎన్నికల చిహ్నమైన సైకిల్ గుర్తును ఎవరికి కేటాయించాలన్నదానిపై ఎన్నికల సంఘం తన తీర్పును వాయిదా వేసింది. రాష్ట్ర ముఖ్యమంత్రి అఖిలేష్ యాదవ్, పార్టీ వ్యవస్థాపకుడు ములాయం సింగ్ యాదవ్ వర్గాల వాదనలను విన్న అనంతరం శుక్రవారం ఈ నిర్ణయం తీసుకుంది. సరైన సమయంలోనే తీర్పును వెలువరిస్తామని స్పష్టం చేసింది.

న్యూఢిల్లీ, జనవరి 13: విభజన చట్టం 10వ షెడ్యూల్‌లోని 107 సంస్థల ఆస్తులు, అప్పులు, నగదు పంపకాలపై కేంద్రం వద్ద జరిగిన చర్చలు విఫలమయ్యాయి. తెలంగాణ, ఆంధ్ర సీనియర్ అధికారులతో హోంశాఖ అదనపుకార్యదర్శి జయదీప్ గోవింద్ జరిపిన చర్చలు కొలిక్కిరాలేదు. అవిభాజిత రాష్ట్ర ఉన్నత విద్యా మండలి ఆస్తులు, అప్పులు, నగదును జనాభా ప్రాతిపదికన పంచుకోవాలని గతంలో సుప్రీంకోర్టు తీర్పునిచ్చిన విషయం తెలిసిందే.