ఇంఫాల్, ఆగస్టు 14: రాజకీయాల్లో చేరాలనే తన నిర్ణయంలో ఎలాంటి మార్పు లేదని మణిపూర్ ‘ఉక్కు మహిళ’ ఇరోం షర్మిల స్పష్టం చేశారు. మణిపూర్‌లో వివాదాస్పదమైన సాయుధ బలగాల ప్రత్యేక అధికారాల చట్టం (అఫ్‌స్పా) అమలును రద్దు చేయాలన్న తన ప్రచారానికి రాజకీయాల్లో చేరడం ద్వారా నూతన దశ మొదలవుతుందన్న ఆశాభావాన్ని ఆమె వ్యక్తం చేశారు.

న్యూఢిల్లీ, ఆగస్టు 14: స్వాతంత్య్ర దినోత్సవాన్ని పురస్కరించుకుని కేంద్ర, రాష్ట్ర భద్రతా బలగాలకు చెందిన మొత్తం 948 మంది పోలీసు సిబ్బందికి ఆదివారం సాహస, సేవా పతకాలను ప్రదానం చేశారు. వీటిలో అత్యున్నతమైన రాష్టప్రతి సాహస పోలీసు పతకాన్ని (పిపిఎంజి) ఇండో-టిబెటన్ బోర్డర్ పోలీసు (ఐటిబిపి) విభాగానికి చెందిన ముగ్గురు సిబ్బందికి అందజేశారు.

న్యూఢిల్లీ, ఆగస్టు 14: ఉగ్రవాదానికి ఎదురెళ్లి సిమి ముష్కరుల ఎదురు కాల్పుల్లో అసువులు బాసిన తెలంగాణ ఎస్‌ఐ దూదేకుల సిద్దయ్య, కానిస్టేబుల్ చౌగోని నాగరాజులకు రాష్టప్రతి శౌర్య పతాకాలు లభించాయి. స్వాతంత్య్ర దినోత్సవం సందర్భంగా విధి నిర్వహణలో అత్యుత్తమ సేవలందించిన పోలీసులకు కేంద్రం ఏటా ప్రకటించే శౌర్య పతకాలు, ప్రెసిడెంట్ పోలీస్ మెడల్ ఫర్ గ్యాలెంటరీ అవార్డులు 38మందికి లభించాయి.

న్యూఢిల్లీ, ఆగస్టు 13: జైషే మొహమ్మద్ ఉగ్రవాది మసూద్ అజార్‌పై ఐరాస నిషేధం విధించకుండా అడ్డుకోవడం, అలాగే ఎన్‌ఎస్‌జిలో సభ్యత్వానికి మెలికలు పెట్టడం సహా అనేక వివాదాస్పద అంశాలను చైనా విదేశాంగ మంత్రి వాంగ్ ఈతో జరిపిన చర్చల్లో భారత్ ప్రస్తావించింది. దాదాపు మూడు గంటలకు పైగా వాంగ్ ఈతో భారత విదేశాంగ మంత్రి సుష్మా స్వరాజ్ శనివారం చర్చలు జరిపారు.