న్యూఢిల్లీ, జూలై 27: తెలుగు రాష్ట్రాల ముఖ్యమంత్రులు ఏన్నో ఆశలు పెట్టుకొన్న శాసనసభ నియోజకవర్గాల సంఖ్య పెంపుపై కేంద్రం నీళ్లు చల్లింది. రెండు రాష్ట్రాల్లో నియోజకవర్గాల సంఖ్య పెంపు ఇప్పట్లో సాధ్యంకాదని స్పష్టం చేసింది. నియోజక వర్గాలు పెంచాలంటే రాజ్యాంగ సవరణ తప్పనిసరని తెలిపింది.

దిల్లీ: ఆమ్ ఆద్మీ పార్టీ అధినేత, దిల్లీ సిఎం కేజ్రీవాల్ మరోసారి ప్రధాని మోదీపై విరుచుకుపడ్డారు. ప్రశ్నించే గుణం ఉన్న వారి గొంతు నొక్కేస్తారని, తనను మోదీ చంపేస్తారని కేజ్రీ ఓ వీడియోలో పేర్కొన్నారు. పలు ఆరోపణలపై ఆప్ ఎమ్మెల్యేలను అరెస్టు చేయిస్తున్నారని మోదీ రాజకీయాలే ఇందుకు కారణమన్నారు. ‘మోదీ నన్ను బతకనివ్వరు’ అంటూ ఆరోపించారు.

చెన్నై: ఇండియన్‌ బ్యాంక్స్‌ అసోసియేషన్‌(ఐబీఏ) మంగళవారం ప్రభుత్వ అధికారులతో చేపట్టిన చర్చలు విఫలమవ్వడంతో గతంలో సమ్మెకు పిలుపు ఇచ్చిన మాదిరిగానే శుక్రవారం (జులై 29న) ఒక్కరోజు సమ్మె చేయనున్నట్లు బ్యాంకు యూనియన్ల ఫోరం వెల్లడించింది. అఖిల భారత బ్యాంకు ఉద్యోగుల అసోసియేషన్‌ (ఏఐబీఈఏ) ప్రధాన కార్యదర్శి సీహెచ్‌ వెంకటాచలం కూడా జులై 29న సమ్మె చేపట్టనున్నట్లు ప్రకటించారు.

దిల్లీ: బిజెపి పాలిత రాష్ట్రాల్లో గోసంరక్షణ ముసుగులో దళితులపై దాడులు మితిమీరిపోతున్నాయని రాజ్యసభలో బుధవారం బిఎస్‌పి సభ్యులు ఆరోపించారు. మధ్యప్రదేశ్‌లో గోమాంసం తీసుకువెళుతున్నారన్న నెపంతో ఇద్దరు దళిత మహిళలను గోసంరక్షణ కార్యకర్తలు చితకబాదడం దారుణమని బిఎస్‌పి ఎంపీలు అన్నారు. పోడియం వద్దకు వారు చేరుకుని ప్రధాని మోదీ దళిత వ్యతిరేకి అంటూ నినాదాలు చేశారు.