జైపూర్: పోలీసులపైకి కాల్పులు జరుపుతూ ఖైదీలు జీపులో పారిపోతుండగా జరిగిన రోడ్డు ప్రమాదంలో ఎనిమిది మంది మరణించారు. మృతుల్లో అయిదుగురు ఖైదీలున్నారు. రాజస్థాన్‌లోని చురూ జిల్లాలో సోమవారం ఈ ఘటన జరిగింది. భూ వివాదానికి సంబంధించి పరారైన ఖైదీలు కోహినా గ్రామానికి చేరుకున్నారన్న సమాచారం అందడంతో పోలీసులు అక్కడికి చేరుకున్నారు. పోలీసులను చూసి ఖైదీలు కాల్పులు జరుపుతూ జీపులో పారిపోతుండగా మరో జీపు ఢీకొంది.

మనాలి (హిమాచల్ ప్రదేశ్): ఇజ్రాయల్ దేశానికి చెందిన యువతిపై మనాలి వద్ద ఇద్దరు దుండగులు అత్యాచారం చేసిన ఘటన సోమవారం వెలుగు చూసింది. మనాలిలో పర్యాటక ప్రాంతాలను చూసేందుకు ఇజ్రాయల్ యువతి తన స్నేహితులతో కలిసి ఆదివారం వచ్చింది. ఆమె స్నేహితులు మరో ప్రాంతాన్ని సందర్శించేందుకు వెళ్లగా ఆమె మనాలిలో ఉండిపోయింది.

దిల్లీ: అత్యాచార బాధితురాలి కడుపులో పెరుగుతున్న పిండం ఆమె ప్రాణాలకు ముప్పుగా మారవచ్చని వైద్యుల కమిటీ నివేదికతో అబార్షన్‌కు సుప్రీం కోర్టు అనుమతి ఇచ్చింది. 24 వారాల గర్భవతి అయిన బాధితురాలి పిటిషన్‌ను విచారించిన న్యాయస్థానం దీనిపై ముంబై వైద్యులతో ఓ కమిటీ ఏర్పాటు చేసి నివేదిక కోరింది. అత్యాచార బాధితురాలి కడుపులో పెరుగుతున్న పిండం అసాధారణంగా ఉందని ద్యుల కమిటీ రిపోర్ట్ ఇచ్చింది.

దిల్లీ: తమ పార్టీ సభ్యుడు ప్రవేశపెట్టిన ప్రైవేటు బిల్లుపై చర్చించాలని కాంగ్రెస్ ఎంపీలు పట్టుబట్టడంతో రాజ్యసభలో సోమవారం గందరగోళం ఏర్పడింది. ఎపికి ప్రత్యేక హోదాకోసం పెట్టిన ప్రైవేటు బిల్లును చర్చించాలని వారు కోరారు. నిబంధనల ప్రకారం దీన్ని ఇపుడు చర్చించలేమని ఆగస్టు 6న సభలో ప్రవేశపెడతామని రాజ్యసభ డిప్యూటీ చైర్మన్ కురియన్ చెప్పినప్పటికీ కాంగ్రెస్ సభ్యులు వినిపించుకోలేదు.