న్యూఢిల్లీ, జూన్ 29: రాజ్యసభకు కొత్తగా ఎంపికయిన 57 మంది ఎంపీల్లో 55 మంది కోటీశ్వరులు. 13 మందిపై క్రిమినల్ కేసులున్నాయి. ఢిల్లీకి చెందిన అసోసియేషన్ ఫర్ డెమోక్రటిక్ రిఫార్మ్స్ అనే సంస్థ ఈ వివరాలను వెల్లడించింది. అత్యధిక ఆస్తులు కలిగి ఉన్న ఎంపీల్లో ఎన్‌సిపికి చెందిన ప్రఫుల్ పటేల్ మొదటిస్థానంలో ఉన్నారు. ఆయన ఆస్తుల విలువ రూ. 252 కోట్లు.

న్యూఢిల్లీ, జూన్ 29: పార్లమెంటు వర్షాకాల సమావేశాలు జూలై 18న ప్రారంభమై ఆగస్టు 12 వరకు జరుగుతాయి. కేంద్ర హోం మంత్రి రాజ్‌నాథ్‌సింగ్ అధక్షతన బుధవారం జరిగిన పార్లమెంటరీ వ్యవహారాల మంత్రివర్గ ఉపసంఘం సమావేశంలో ఈ మేరకు నిర్ణయం తీసుకున్నారు. ఈ సమావేశాల్లో వస్తుసేవల పన్ను చట్టాని (జిఎస్‌టి)కి రాజ్యసభలో కచ్చితంగా ఆమోదం పొందుతామని కేంద్రం ధీమా వ్యక్తం చేసింది.

న్యూఢిల్లీ, జూన్ 29: ముస్లిం మతంలో అమలవుతున్న ‘తలాక్’ (ట్రిపుల్ తలాక్) విధానం రాజ్యాంగ చట్రం ప్రమాణాలకు అనుగుణంగా ఉందో లేదో పరిశీలించనున్నట్లు సుప్రీంకోర్టు బుధవారం తెలిపింది. తలాక్ చెప్పి విడాకులిచ్చే విధానం ప్రజలలో ఓ పెద్దవర్గాన్ని ప్రభావితం చేస్తోందని, అందువల్ల ఇది చాలా ముఖ్యమైన అంశమని అత్యున్నత న్యాయస్థానం వ్యాఖ్యానించింది.

న్యూఢిల్లీ, జూన్ 29: దేశంలో స్వలింగ సంపర్కాన్ని నేరంగా పరిగణించే భారత శిక్షాస్మృతి (ఐపిసి)లోని 377 సెక్షన్‌ను కొట్టివేయాలని కోరుతూ స్వలింగ సంపర్కులమని ప్రకటించుకున్న కొంతమంది ప్రముఖులు దాఖలు చేసుకున్న పిటిషన్‌ను సుప్రీంకోర్టు బుధవారం ఇప్పటికే ఈ వ్యవహారాన్ని విచారిస్తున్న బెంచ్‌కి నివేదించింది.