దిల్లీ: ఏడో వేతన సంఘం సిఫార్సుల అమలుకు ప్రధాని నరేంద్ర మోదీ సుముఖంగా ఉన్నట్టు సమాచారం. ఈ విషయమై ఆయన ఆర్థికశాఖకు ఆదేశాలు జారీ చేశారని తెలిసింది. ఏడో వేతన సంఘం సిఫార్సులను అమలు చేసే విషయమై బుధవారం జరిగే కేంద్ర క్యాబినెట్ సమావేశంలో తుది నిర్ణయం ప్రకటించే అవకాశం ఉంది. 47 లక్షల మంది కేంద్ర ప్రభుత్వ ఉద్యోగులకు, 52 లక్షల మంది పెన్షన్‌దారులకు దీని వల్ల ఆర్థిక ప్రయోజన0 చేకూరుతుంది.

ముంబయి: రిజర్వుబ్యాంకు ఆఫ్ ఇండియా (ఆర్‌బిఐ) తదుపరి గవర్నర్‌గా ఎవరిని నియమించాలన్న అంశంపై కేంద్ర ప్రభుత్వం కసరత్తు ప్రారంభించింది. ప్రస్తుత ఆర్‌బిఐ గవర్నర్ రఘురామ్ రాజన్ పదవీ కాలం కొద్దిరోజుల్లోనే పూర్తవుతుంది. రెండోసారి ఆ బాధ్యతలను చేపట్టే ఆసక్తి తనకు లేదని రాజన్ ప్రకటించిన సంగతి తెలిసిందే. దీంతో గవర్నర్ పదవిని భర్తీ చేసేందుకు కొన్ని పేర్లను కేంద్రం పరిశీలిస్తోంది.

దిల్లీ: యుపి సిఎం అభ్యర్థిత్వానికి దిల్లీ మాజీ ముఖ్యమంత్రి షీలా దీక్షిత్ సుముఖత చూపలేదని కాంగ్రెస్ వర్గాల సమాచారం. వచ్చే ఏడాది యుపి అసెంబ్లీ ఎన్నికలు జరుగనున్నందున ఆమెను సిఎం అభ్యర్థిగా ప్రకటించాలని కాంగ్రెస్ హైకమాండ్ యోచించింది. అయితే, అందుకు షీలా అయిష్టంగా ఉన్నారని తెలిసింది. దీంతో పార్టీ పంజాబ్ వ్యవహరాల ఇన్‌చార్జి బాధ్యతలను ఆమెకు అప్పగించాలని కాంగ్రెస్ నాయకత్వం భావిస్తోంది.

బెంగళూరు, జూన్ 26: ముద్దంటే ఎవరికి చేదు...? అయితే బహిరంగంగా అందరూ చూస్తుండగా ముద్దు పెట్టుకుంటే ఎవరికైనా ఇబ్బందిగానే ఉంటుంది. ముఖ్యమంత్రి లాంటి ప్రజా జీవితంలో ఉన్న వాళ్లయితే మరీ చెప్పాల్సిన పని లేదు. కర్నాటక ముఖ్యమంత్రి సిద్ధరాయమ్యకు పాపం ఇలాంటి అనుభవమే ఎదురయింది. ఆదివారం నగరంలో జరిగిన ఓ బహిరంగ సభలో ఓ మహిళ ఆయన బుగ్గమీద ముద్దు పెట్టుకుంది.