చెన్నై: ఇటీవలి అసెంబ్లీ ఎన్నికల్లో పార్టీ ఓటమికి నైతిక బాధ్యత వహిస్తూ తమిళనాడు పిసిసి అధ్యక్షుడు ఎలంగోవన్ తన పదవికి రాజీనామా చేశారు. వాస్తవానికి ఆయన ఈనెల 15నే రాజీనామా సమర్పించినప్పటికీ కాంగ్రెస్ అధిష్ఠానం ఇంతవరకూ స్పందించలేదు. అసెంబ్లీ ఎన్నికల్లో డిఎంకెతో జతకట్టిన కాంగ్రెస్ పార్టీ 41 స్థానాల్లో పోటీ చేయగా 8 చోట్ల మాత్రమే గెలిచింది.

దిల్లీ: దిల్లీలో ప్రధాని మోదీ ఎమర్జన్సీ విధించారా?- అంటూ దిల్లీ సిఎం అరవింద్ కేజ్రీవాల్ తాజాగా ట్విట్టర్‌లో వ్యాఖ్యానించారు. ఆప్ ఎమ్మెల్యే దినేశ్‌ను పోలీసులు అకారణంగా అరెస్టు చేశారని ఆయన ఆరోపించారు. తన పార్టీకి చెందిన ప్రజాప్రతినిధులపై తప్పుడు కేసులు పెట్టి అక్రమ అరెస్టులతో వేధిస్తున్నారన్నారు.

దిల్లీ: దిల్లీలోని సంగమ్ విహార్ నియోజకవర్గానికి ఆమ్ ఆద్మీ పార్టీ (ఆప్) ఎమ్మెల్యేగా ప్రాతినిధ్యం వహిస్తున్న దినేశ్ మొహానియాను పోలీసులు శనివారం అరెస్టు చేశారు. నీటి సరఫరా సరిగా లేదని ఫిర్యాదు చేసినందుకు వచ్చిన మహిళల పట్ల అసభ్యకరంగా ప్రవర్తించినట్లు ఆయనపై కేసు నమోదైంది. మీడియా సమావేశంలో మాట్లాడుతుండగా దినేశ్‌ను పోలీసులు అరెస్టు చేశారు.

న్యూఢిల్లీ,జూన్ 24: ఐరోపా దేశాల కూటమి నుండి బయటకు రావాలని బ్రిటన్ నిర్ణయించుకున్న నేపథ్యంలో నేపథ్యంలో బ్రెగ్జిట్ ఫలితాలను ఎదుర్కొనేందుకు కేంద్ర ప్రభుత్వం సన్నద్ధంగా ఉందని ఆర్థిక మంత్రి మంత్రి అరుణ్‌జైట్లీ భరోసా ఇచ్చారు. బ్రిటన్ యూరో నుంచి బయటకు రావడం వల్ల పలు దేశాల ఆర్థిక వ్యవస్థపై ప్రతికూల ప్రభావం పడుతుందనే ప్రచారం జరుగుతున్న సమయంలో జైట్లీ శుక్రవారం ఈ ప్రకటన చేయటం గమనార్హం.