దిల్లీ: ప్రధానికి ముఖ్య ఆర్థిక సలహాదారుగా వ్యవహరిస్తున్న అరవింద్ సుబ్రమణియన్‌కు తక్షణం ఉద్వాసన పలకాలంటూ బిజెపి ఎంపీ సుబ్రమణ్యస్వామి డిమాండ్ చేసిన నేపథ్యంలో ఇద్దరు కేంద్ర మంత్రులు స్పందించారు. అరవింద్‌పై తమకు పూర్తి నమ్మకం ఉందని, ఆయన ఇచ్చే సలహాలకు ఎంతో విలువ ఉందని కేంద్రమంత్రులు అరుణ్ జైట్లీ, రవిశంకర్ ప్రసాద్ అన్నారు.

ముంబయి: మహారాష్ట్ర సదన్ కుంభకోణం కేసులో ఎన్‌సిపి నేత, మాజీ మంత్రి ఛగన్ భుజ్‌బల్‌కు, ఆయన మేనల్లుడు సమీర్‌లకు ఇక్కడి ఎసిబి ప్రత్యేక కోర్టు బుధవారం బెయిల్ మంజూరు చేసింది. అయితే, మరికొన్ని పెండింగ్ కేసుల వల్ల వారు జైలు నుంచి విడుదల కాని పరిస్థితి నెలకొంది. ఏభై వేల రూపాయల పూచీకత్తుపై భుజ్‌బల్, సమీర్‌లకు ఎసిబి కోర్టు బెయిల్ ఇచ్చినా ఫలితం లేకుండా పోయింది.

దిల్లీ: ప్రపంచ మార్కెట్ల ప్రభావం, నగల వ్యాపారుల నుంచి డిమాండు లేకపోవడం తదితర కారణాల వల్ల బంగారం ధర తగ్గిందని బులియన్‌ మార్కెట్‌ వర్గాలు తెలిపాయి. పసిడి ధర బుధవారం రూ.50 తగ్గడంతో 99.9శాతం స్వచ్ఛత గల పది గ్రాముల పసిడి రూ.29,700కి చేరింది. సింగపూర్‌ బులియన్‌ మార్కెట్‌లో ఔన్సు బంగారం ధర 0.5శాతం తగ్గి 1,261.27 యూఎస్‌ డాలర్లకు చేరింది. జూన్‌9 తర్వాత ఇదే కనిష్ఠ ధర కావడం గమనార్హం.

దిల్లీ: కృష్ణానదీ జలాల పంపకంపై ఎపి, తెలంగాణ మధ్య ఏకాభిప్రాయం సాధ్యం కాలేదు. ఇక్కడ బుధవారం జరిగిన కృష్ణానదీ యాజమాన్య బోర్డు సమావేశంలో ఈ ఉభయ రాష్ట్రాల ప్రతినిధులు ఎవరివాదనలు వారు వినిపించారు. బచావత్ ట్రైబ్యునల్ ప్రకారం గత ఏడాది లాగానే మరో నెల రోజుల పాటు కృష్ణాజలాలను వినియోగించుకోవాలని కృష్ణా బోర్డు ఇరు రాష్ట్రాలకూ సూచించింది. దీనిపై ఏకాభిప్రాయం కుదరని నేపథ్యంలో సమావేశం వాయిదా పడింది.