న్యూఢిల్లీ, మే 21: కేంద్ర ప్రభుత్వం దేశ రక్షణకు అవసరమైన అన్ని చర్యలు తీసుకుంటోందని కేంద్ర హోంమంత్రి రాజ్‌నాథ్ సింగ్ చెప్పారు. అన్ని కులాలు, మతాలకు చెందిన ప్రజలు తమ శక్తియుక్తులను కూడదీసుకొని ఉగ్రవాద శక్తులకు వ్యతిరేకంగా పోరాడుతారని ఆయన పేర్కొన్నారు. శనివారం ఇక్కడ జరిగిన అంతర్జాతీయ బుద్ధ పూర్ణిమ దినోత్సవంలో రాజ్‌నాథ్‌తో పాటు కేంద్ర హోంశాఖ సహాయ మంత్రి కిరెన్ రిజిజు పాల్గొన్నారు.

ఉజ్జయిని, మే 21: నెలరోజుల పాటు సాగిన సింహస్థ కుంభమేళా ఘనంగా ముగిసింది. శనివారం ఆఖరి రోజుకావడంతో తెల్లవారు జామునే సాధువులు, నాగసాధువులు స్నానఘట్టాలకు చేరుకున్నారు. క్షిప్రా నదీ తీరమంతా కిటకిటలాడింది. హరహర మహాదేవ నినాదాలతో దిక్కులు పిక్కటిల్లాయి. ఆఖరి రోజు దేశం నలుమూలల నుంచి తరలివచ్చిన లక్షలాది మంది భక్తులు ప్రవిత్ర స్నానాలు ఆచరించారని ప్రధాన పురోహితుడు ఈశ్వర్ శర్మ వెల్లడించారు.

న్యూఢిల్లీ, మే 21: బాబ్రీ మసీదు కూల్చివేత, గుజరాత్ మారణహోమం, కాశ్మీర్, ముజఫర్‌నగర్‌లలోముస్లింలను చంపేసినందుకు భారత్‌పై ప్రతీకారం తీర్చుకోవడానికి కత్తులతో వస్తున్నామని ఇస్లామిక్ స్టేట్ ఉగ్రవాద సంస్థ తాజాగా విడుదల చేసిన ఓ వీడియోలో హెచ్చరించింది. ఆన్‌లైన్‌లో అరబిక్ భాషలో ఉంచిన 22 నిమిషాల నిడివి కలిగిన ఈ వీడియోలో భారత్‌నుంచి వచ్చిన ఐదుగురు వ్యక్తులు తమ సంస్థలో ఏయే హోదాలో ఉన్నారో కూడా వివరించింది.

దిల్లీ: మాజీ ప్రధాని రాజీవ్ గాంధీ 25వ వర్ధంతి సందర్భంగా శనివారం ఇక్కడ జరిగిన యువజన కాంగ్రెస్ సమావేశానికి కాంగ్రెస్ యువనేత రాహుల్ గాంధీ హాజరుకాకపోవడం చర్చనీయాంశమైంది. కాంగ్రెస్ అధినేత్రి సోనియా గాంధీ మాత్రమే ఈ సమావేశంలో పాల్గొన్నారు. ఇటీవల జరిగిన 5 రాష్ట్రాల ఎన్నికల్లో పుదుచ్చేరి మినహా మిగతా నాలుగు రాష్ట్రాల్లో కాంగ్రెస్ పార్టీ చతికిలబడడంతో రాహుల్ డీలా పడ్డారని పార్టీ వర్గాల సమాచారం.