చెన్నై: తమిళనాడు అసెంబ్లీ ఎన్నికలకు శుక్రవారం ఎన్నికల సంఘం నోటిఫికేషన్ విడుదలైంది. ఎన్నికల షెడ్యూల్ ప్రకారం 234 అసెంబ్లీ స్థానాలకు నామినేషన్ల దాఖలుకు ఏప్రిల్ 29 చివరి తేదీ కాగా, ఆ మరుసటి రోజే నామినేషన్ల పరిశీలన జరుగుతుంది. నామినేషన్ల ఉపసంహరణ మే 2వ తేదీతో ముగుస్తుంది. మే 16న ఉదయం 7 గంటల నుంచి సాయంత్రం 6 గంటల వరకు పోలింగ్ జరుగుతుంది. మే 19న ఓట్ల లెక్కింపు నిర్వహిస్తారు.

దిల్లీ: ఉత్తరాఖండ్‌లో రాష్టప్రతి పాలనను రద్దు చేస్తూ నైనిటాల్ హైకోర్టు ఇచ్చిన తీర్పును నిలిపివేస్తూ శుక్రవారం సుప్రీం కోర్టు ఉత్తర్వులిచ్చింది. ఈ నెల 27న తాము తీర్పు ఇచ్చేవరకూ ‘స్టే’ అమలులో ఉంటుందని సుప్రీం తెలిపింది. అప్పటి వరకూ గవర్నర్‌కే అన్ని అధికారాలూ ఉంటాయి. సుప్రీం స్టేతో మాజీ సిఎం హరీష్ రావత్‌కు ఎదురుదెబ్బ తగిలినట్టయ్యింది.

రాయ్‌పూర్: చత్తీస్‌గఢ్‌లోని బస్తర్- సుకుమా జిల్లాల సరిహద్దులోని అటవీ ప్రాంతంలో శుక్రవారం సిఆర్‌పి జవాన్లకు, మావోయిస్టులకు మధ్య ఎదురుకాల్పులు జరిగాయి. ఈ ఘటనలో ఇద్దరు మావోలు మరణించినట్లు సమాచారం. పూర్తి వివరాలు ఇంకా తెలియాల్సి ఉందని అధికారులు చెబుతున్నారు.

ముంబయి: కేంద్ర రైల్వేమంత్రి సురేష్ ప్రభు శుక్రవారం ఇక్కడ లోకల్ రైలులో ప్రయాణించి అందరినీ ఆశ్చర్యంలో ముంచెత్తారు. ఓ శంకుస్థాపన కార్యక్రమానికి హాజరైన ఆయన సచివాలయంలో ముఖ్యమంత్రి దేవేంద్ర ఫడ్నవీస్‌ను కలిసేందుకు ఛత్రపతి శివాజీ టెర్మినల్ లోకల్ రైలు ఎక్కారు. ఫస్ట్‌క్లాస్ కంపార్ట్‌మెంటులో ఎక్కిన ఆయన గమ్యస్థానం చేరేవరకూ నిలబడే ప్రయాణించారు. ఆయన వెంట రైల్వేశాఖ ఉన్నతాధికారులు, భద్రతా సిబ్బంది ఉన్నారు.