న్యూఢిల్లీ: కేంద్ర విశ్వవిద్యాలయం పరిశోధక విద్యార్థి రోహిత్ వేముల ఆత్మహత్యపై చర్చ జరిగిన సందర్భంగా పార్లమెంట్‌ను తప్పుదోవ పట్టించారని ఆరోపిస్తూ కేంద్ర మానవ వనరుల శాఖ మంత్రి స్మృతి ఇరానీపై సభా హక్కుల తీర్మానం ప్రతిపాదించేందుకు కాంగ్రెస్, వామపక్షాలు, జెడి(యు) తదితర ప్రతిపక్షాలు సిద్ధమవుతున్నాయి. ప్రతిపక్షాలు ఈ అంశంపై సోమవారం లోక్‌సభలో సభా హక్కుల తీర్మానాన్ని ప్రతిపాదించనున్నాయి.

ముంబయి: జవహర్‌లాల్ నెహ్రూ విశ్వవిద్యాలయం వివాదంలో బిజెపి నేతృత్వంలోని కేంద్ర ప్రభుత్వం అనుసరిస్తున్న వైఖరిపై ఎన్‌సిపి అధినేత శరద్ పవార్ తీవ్రస్థాయిలో మండిపడ్డారు. త్వరలో వివిధ రాష్ట్రాల్లో జరుగనున్న ఎన్నికల్లో ఓడిపోతాననే భయంతో బిజెపి వేర్పాటువాద విత్తనాలు నాటుతోందని ఆయన తీవ్ర స్థాయిలో ధ్వజమెత్తారు.

చాలకాలంగా ఊరిస్తూ వచ్చిన భారత్, పాకిస్తాన్ మ్యాచ్ చివరికి ఎలాంటి ఉత్కంఠను రేపకుండానే ముగిసింది. ఆసియా కప్ టి-20 చాంపియన్‌షిప్‌లో పాకిస్తాన్‌ను 83 పరుగులకే అలౌట్ చేసిన భారత్ అత్యంత సాధారణమైన లక్ష్యాన్ని ఐదు వికెట్లు కోల్పోయి ఛేదించింది. ఇరు జట్లు భారీగా స్కోర్లు చేస్తాయని అనుకున్నా, బౌలర్ల ఆధిపత్యం కొనసాగడం అభిమానులను నిరాశ పరచింది. ఇందులో పాక్ 17.3, భారత్ 15.3 చొప్పున ఓవర్లు ఆడాయి.

బెల్గాం (కర్నాటక): మొత్తం ప్రపంచ ఆర్థిక వ్యవస్థకే భారత దేశం చుక్కాని లాంటిదని ప్రధాన నరేంద్ర మోదీ అన్నారు. ఆర్థిక మాంద్యంతో పాటు అనేక రకాలుగా సమస్యలను ఎదుర్కొంటున్న ప్రపంచ దేశాలకు ఒక్క భారత దేశమే ఆశాకిరణంగా భాసిల్లుతోందని చెప్పారు. ఇందుకు సంబంధించి ప్రపంచ బ్యాంక్, ఐఎమ్‌ఎఫ్, ఇతర రేటింగ్ సంస్థలు వెలువరించిన నివేదికలను మోదీ ఉటంకించారు.