చెన్నై : తమిళనాడులోని కడలూరులో సోమవారం 15 పాఠశాలలకు బాంబు పెట్టామంటూ బెదిరింపు ఫోన్ కాల్స్ వచ్చాయి. దీంతో పిల్లలందర్నీ ఇళ్లకు పంపివేసి బాంబు స్క్వాడ్‌తో పోలీసులు గాలింపు చర్యలు చేపట్టారు. పిల్లలంతా క్షేమంగా ఉన్నారని, ఎవరో ఆకతాయిలు ఇలా ఫోన్లు చేసి బెదిరించారని పోలీసులు తెలిపారు.

ముంబై: ముంబై దాడుల కుట్ర కేసులో ఉగ్రవాది డేవిడ్ హెడ్లీ సోమవారం కీలక సాక్ష్యం చెప్పే అవకాశం ఉంది. ముంబై కోర్టులో వీడియో కాన్ఫరెన్స్ ద్వారా ఆయన సాక్ష్యాన్ని న్యాయమూర్తి నమోదు చేస్తారు. ముంబై దాడుల్లో పాకిస్తాన్ పాత్రకు సంబంధించి హెడ్లీ నోరు విప్పే అవకాశం ఉంది.

పూరీ: ప్రధాన మంత్రి నరేంద్ర మోదీ ఆదివారంనాడు ఒడిశాలోని పూరీ జగన్నాథ స్వామి ఆలయాన్ని సందర్శించారు. 12వ శతాబ్దానికి చెందిన ఈ ఆలయాన్ని సందర్శించిన మోదీకి అక్కడి పూజారులు, స్థానిక బిజెపి నేతలతోపాటు ఆలయ కమిటీ పాలనాధికారి ఎస్.సి.మహాపాత్ర తదితరులు ఘనస్వాగతం పలికారు. దాదాపు 30 నిమిషాలపాటు మోదీ ఆలయంలో గడిపారు.

న్యూఢిల్లీ, ఫిబ్రవరి 7: ఆదాయం పన్ను శాఖకు చెందిన ఇండియన్ రెవిన్యూ సర్వీస్ (ఐఆర్‌ఎస్) అధికారిక వెబ్‌సైట్‌ను పాకిస్తాన్‌కు చెందిన కొన్ని ముఠాలు హ్యాక్ చేశాయి. ‘డబ్ల్యుడబ్ల్యుడబ్ల్యు.ఐఆర్‌ఎస్‌ఆఫీసర్స్‌ఆన్‌లైన్.జిఓవి.ఇన్’ అనే ఈ అధికారిక వెబ్‌సైట్‌ను శనివారం తెల్లవారుజామున హ్యాక్ చేశారని, అప్పటినుంచి అది అందుబాటులో లేకుండా పోయిందని అధికారులు చెప్పారు.