న్యూఢిల్లీ: వచ్చే ఎన్నికల్లో టీడీపీకి పరాభవం తప్పదని బీజేపీ ఎంపీ జీవీఎల్ నరసింహారావు అన్నారు. ఆయన గురువారంనాడు మీడియాతో మాట్లాడుతూ చంద్రబాబు బీద పలుకులు పలుకుతూ ఢిల్లీ దీక్షకు రూ.10 కోట్లు ఖర్చుపెట్టారని విమర్శించారు. ప్రజాధనంతో సోకులు చేసుకుంటున్నారని అన్నారు.

లక్నో: భారతీయ జనతాపార్టీ అధ్యక్షుడు అమిత్‌షా కుంభమేళాను సందర్శించి పుణ్యస్నానం ఆచరించారు. ఆయన గంగా యమున, సరస్వతి నదులు కలిసే త్రివేణి సంగమం వద్ద ముఖ్యమంత్రి యోగి, మరికొంత మంది సాధువులతో కలిసి స్నానమాచరించారు. ఆ తరువాత నదికి హారతి ఇచ్చారు. జునా అఖాడా ఆశ్రమంలో స్వామీజీల ఆశీర్వాదం తీసుకున్నారు. సీఎం యోగితో కలిసి సహపంక్తి భోజనాలు చేశారు.

లక్నో: యూపీలో ఓబీసీ పార్టీతో కాంగ్రెస్ పొత్తు పెట్టుకుంటుందని ఆ పార్టీ తూర్పు విభాగం ఇన్‌చార్జి ప్రియాంక గాంధీ అన్నారు. ఓబీసీ మహాన్‌దళ్ పార్టీ అధినేత వౌర్యాజీకి స్వాగతం పలుకుతున్నానని ప్రియాంక ప్రకటించారు. యూపీ ఎన్నికల్లో అన్ని వర్గాల ప్రజలకు ప్రాతినిథ్యం కల్పించాలనే రాహుల్ ఆలోచనలలో భాగంగా మేం కలిసి పోరాడతాం అని అన్నారు.

న్యూఢిల్లీ: ఢిల్లీ అధికారాలపై సుప్రీం కోర్టు గురువారంనాడు తీర్పునిచ్చింది. జస్టిస్ సిక్రి, జస్టిస్ అశోక్‌భూషన్‌తోకూడిన ధర్మాసనం ఈ తీర్పును వెలువరించింది. అవినీతి నిరోధక శాఖ లెఫ్ట్‌నెంట్ గవర్నర్ చేతిలో ఉంటుందని పేర్కొంది. అలాగే పోలీసులపై రాష్ట్ర ప్రభుత్వానికి నియంత్రణ లేదని స్పష్టం చేసింది. ఇక విచారణ కమిటీ కేంద్రం ఆధీనంలోనే పనిచేస్తుందని తెలిపింది.