చత్తీస్‌గఢ్: వ్యవసాయ ఉత్పత్తి కేంద్రాలుగా చత్తీస్‌గఢ్, మధ్యప్రదేశ్ రాష్ట్రాలను రానున్న ఐదేళ్లలో తీర్చిదిద్దుతామని కాంగ్రెస్ పార్టీ అధ్యక్షుడు రాహుల్ గాంధీ అన్నారు. ఆయన చత్తీస్‌గఢ్‌లోని చరమ ఎన్నికల సభలో మాట్లాడుతూ దేశానికి ఆహారం, పండ్లు, కూరగాయాలు సరఫరా చేసే స్థాయికి తీసుకువెళతామని, ప్రధాని మోదీ దేశంలో 15 మంది వ్యక్తుల కోసమే పనిచేస్తున్నారని విమర్శించారు.

కేరళ: శబరిమల యాత్రకు ఆన్‌లైన్‌లో దాదాపు 550 మంది అమ్మాయిలు టిక్కెట్లు బుక్ చేసుకున్నారని ట్రావెన్ కోర్ దేవస్థానం తెలిపింది. అలాగే శుక్రవారంనాటికి దాదాపు 3.50 లక్షల మంది టిక్కెట్లు బుక్ చేసుకున్నారు. శబరిమల ఆలయంలోకి అన్ని వయసుల మహిళలు హాజరుకావచ్చని సుప్రీం కోర్టు ఇచ్చిన తీర్పుతో గత రెండు నెలల నుంచి ఆలయ పరిసరాల్లో ఉద్రిక్త పరిస్థితులు ఏర్పడిన విషయం విదితమే.

అసోం: రాష్ట్రంలోని జోర్హత్ వైద్య కళాశాల ఆసుపత్రిలో దారుణం చోటుచేసుకుంది. తొమ్మిది రోజుల్లో 19మంది నవజాత శిశువులు చనిపోయారు. యునిసెఫ్ ప్రతినిధులు ఆసుపత్రిని సందర్శించారు. పదిమంది శిశువులు తక్కువ బరువుతో పుట్టడం వల్ల మృతిచెందారని, ముగ్గురు శిశువులు హృద్రోగాలతోనూ, ఆరుగురు ప్రసవ సమయంలో తలెత్తిన ఇబ్బందులు వల్ల చనిపోయారని ఆసుపత్రి వర్గాలు ప్రకటించాయి.

జగదల్‌పూర్: అర్బన్ మావోయిస్టులను కాంగ్రెస్ వెనుక ఉండి ప్రోత్సహిస్తూ ఆదివాసీల జీవితాలను నాశనం చేస్తోందని ప్రధాని నరేంద్రమోదీ ఆరోపించారు. చత్తీస్‌గఢ్‌లో జరిగే ఎన్నికలను పురస్కరించుకుని శుక్రవారం ఆయన రాష్ట్రంలో మొదటిసారిగా ఎన్నికల ప్రచారంలో పాల్గొన్నారు. ఈ సందర్భంగా ఏర్పాటు చేసిన సభలో ఆయన మాట్లాడుతూ ఆదివాసీలను కాంగ్రెస్ ఎందుకు ఎగతాళి చేస్తోందో అర్థం కావడం లేదని అన్నారు.