మన రక్షణమంత్రి ఎవరు?
భగవంతుడు.
దయతలిచి ఆయన ఓ కంట కనిపెడుతున్నాడు కాబట్టే ఈ మాత్రమైనా ఉన్నాం. ఎలాగూ దేవుడు చూసుకుంటాడు కాబట్టి మనలనేలే వారు కూడా సరిహద్దుల రక్షణ భారాన్ని ఆయన మీదే వదిలేశారు.

భూమి తన చుట్టూ తాను తిరుగుతూ సూర్యుడిచుట్టూ తిరుగుతుంది.
అలాగే- తెలుగుభాష ఇప్పుడు తన చుట్టూ తాను తిరుగుతూ సాంస్కృతిక శాఖ చుట్టూ తిరుగుతోంది.
తనచుట్టూ తాను ఎందుకు తిరుగుతోందంటే ప్రజలచుట్టూ తిరిగేందుకు, జనంలోకి చొచ్చుకు వెళ్లేందుకు సర్కారువారు వీలు కలిపించలేదు కనుక.

పూర్వం స్వయంవరం ప్రకటించాకే ఎక్కడెక్కడి రాజకుమారులూ పోటీకి వచ్చేవారు. మన మారాజులు ఇంకా ఫాస్టు. స్వయంవరం ప్రకటించకుండానే, సాధారణ ఎన్నికలకు ఇంకో సంవత్సరం ఉండగానే ప్రధాని వరమాల వేయించుకోగోరే వారు తలా ఒక రకంగా మెడలు ముందుకు వంచుతున్నారు.

ఇది ఇండియా మార్కు న్యాయం!
ముంబయి మహానగరంలో పట్టపగలు ఒకే రోజు పదమూడుచోట్ల ఆర్డీఎక్స్ బాంబులు పేల్చి 257 మందిని పొట్టన పెట్టుకున్న టెర్రరిస్టు ఘాతుకం కేసులో తుది తీర్పుకు ఇరవై ఏళ్లు (మాత్రమే) పట్టింది!