సియోల్, మార్చి 5: భారత మహిళల హాకీ జట్టు 1-0 గోల్స్ తేడాతో కొరియాపై విజయం సాధించి ఇక్కడ ప్రారంభమైన ఐదు మ్యాచ్‌ల సిరీస్‌లో శుభారంభం చేసింది. ఇందులో భాగంగా జరిగిన మొదటి మ్యాచ్‌లో భారత మహిళలు 1-0తో విజయం సాధించారు. చివరివరకూ ఉత్కంఠగా సాగిన మ్యాచ్‌లో భారత క్రీడాకారిణులు అద్భుతమైన ఆటతీరును ప్రదర్శించారు. మ్యాచ్ ఐ నిమిషంలో భారత క్రీడాకారిణి లాల్రేమ్‌షియామి గోల్ చేసి భారత్‌ను ఆధిక్యంలో నిలిపింది.

న్యూఢిల్లీ, మార్చి 4: ఐఎస్‌ఎస్‌ఎఫ్ వరల్డ్ కప్ షూటింగ్ చాంపియన్‌షిప్ పురుషుల 10 మీటర్ల ఎయిర్ పిస్టల్ ఈవెంట్‌లో భారత ఏస్ షూటర్ షాజర్ రిజ్వీ కొత్త రికార్డు నెలకొల్పాడు. మొత్తం 242.3 పాయింట్లను సంపాదించిన అతను రికార్డుతోపాటు స్వర్ణ పతకాన్ని తన ఖాతాలో వేసుకున్నాడు. ఒలింపిక్స్ డిఫెండింగ్ చాంపియన్ క్రిస్టియన్ రీజ్ (జర్మనీ)ని అతను రెండో స్థానానికి నెట్టేయడం విశేషం.

ట్రై సిరీస్‌లో ఆడేందుకు శ్రీలంకకు బయలుదేరే ముందు సహచరులతో కలిసి ఆదివారం ముంబయి విమానాశ్రయంలో సేదతీరుతున్న రోహిత్ శర్మ. రెగ్యులర్ కెప్టెన్ విరాట్ కోహ్లీకి విశ్రాంతినిచ్చిన సెలక్టర్లు కెప్టెన్సీ పగ్గాలను అతనికి అప్పగించిన విషయం తెలిసిందే. శ్రీలంక, బంగ్లాదేశ్ జట్లు కూడా ఈ ట్రై సిరీస్‌లో ఆడుతున్నాయి. ఈనెల 6న తొలి మ్యాచ్‌లో శ్రీలంకను భారత్ ఢీ కొంటుంది. 8న బంగ్లాదేశ్‌తో ఆడుతుంది.

బర్మింగ్‌హామ్, మార్చి 4: ప్రపంచ ఇన్‌డోర్ అథ్లెటిక్స్ చాంపియన్‌షిప్స్ పురుషుల 60 మీటర్ల పరుగులో అమెరికాకు చెందిన క్రిస్టియన్ కోల్‌మన్ కొత్త రికార్డు నెలకొల్పాడు. ప్రపంచ రికార్డును ఇప్పటికే తన పేరిట నమోదు చేసుకున్న కోల్‌మన్ ఇన్‌డోర్ రికార్డును కూడా తన ఖాతాలో వేసుకున్నాడు. లక్ష్యాన్ని 6.34 సెకన్లలో చేరిన అతను 20 ఏళ్ల క్రితం వౌరిస్ గ్రీస్ నెలకొల్పిన రికార్డును 0.03 సెకన్ల తేడాతో బద్దలు కొట్టాడు.