లండన్, ఆగస్టు 9: దక్షిణాఫ్రికా సంచలన అథ్లెట్ వేడ్ వాన్ నికెర్క్ ఈసారి ప్రపంచ అథ్లెటిక్స్ చాంపియన్‌షిప్స్‌లో బోణీ చేశాడు. పురుషుల 200, 400 మీటర్ల పరుగులో డిఫెండింగ్ చాంపియన్‌గా బరిలోకి దిగిన అతను 400 మీటర్ల విభాగంలో స్వర్ణ పతకం సాధించాడు. 200 మీటర్ల విభాగంలో అతను పోటీపడాల్సి ఉంది. 25 ఏళ్ల వాన్ నికెర్క్ 400 మీటర్ల పరుగును 43.98 సెకన్లలో పూర్తి చేసి స్వర్ణ పతకాన్ని సాధించాడు.

న్యూఢిల్లీ, ఆగస్టు 9: గ్లాస్గో (స్కాట్‌లాండ్)లో ఈనెల 21 నుంచి ప్రారంభం కానున్న ప్రపంచ బాడ్మింటన్ చాంపియన్‌షిప్స్‌లో భారత స్టార్లు పివి సింధు, సైనా నెహ్వాల్ ఏకంగా రెండో రౌండ్ నుంచి పోరాటం సాగిస్తారు. వీరిద్దరికీ తొలి రౌండ్‌లో బై లభించింది. ఈ మెగా టోర్నీలో సింధు రెండు పర్యాయాలు కాంస్య పతకాన్ని సాధించగా, 2015లో సైనా రజత పతకాన్ని కైవసం చేసుకుంది.

నాగపూర్, ఆగస్టు 9: ప్రో కబడ్డీ లీగ్‌లో భాగంగా బుధవారం జరిగిన మ్యాచ్‌లో బెంగాల్ వారియర్స్‌పై బెంగళూరు బుల్స్ ఆరు పాయింట్ల తేడాతో విజయం సాధించింది. బెంగళూరు 31 పాయింట్లు చేయగా, బెంగాల్ 25 పాయింట్ల వద్ద ఆగిపోయింది. బెంగళూరు తరఫున అజయ్ కుమార్ 8 పాయింట్లతో టాప్ స్కోరర్‌గా నిలిచాడు. రోహిత్ కుమార్ 6, ఆశిష్ కుమార్ 5 చొప్పున పాయింట్లు చేశారు.

లండన్, ఆగస్టు 8: ప్రపంచ అథ్లెటిక్ చాంపియన్‌షిప్స్‌లో మన దేశానికి చెందిన నిర్మలా షేవోరాన్ 400 మహిళల 400 మీటర్ల పరుగుపందెం సెమీ ఫైనల్స్‌లో అట్టడుగున నిలిచి అందరినీ నిరాశ పరిచింది. నిర్మల వ్యక్తిగత ఉత్తమ టైమింగ్ 51.28 సెకన్లు కాగా, ఈ పోటీలో ఆమె 53.07 సెకన్లలో రేస్‌ను పూర్తి చేసి సెమీఫైనల్స్ రెండో హీట్‌లో పాల్గొన్న ఎనిమిది మందిలో ఏడో స్థానంలో నిలిచింది.