ముంబయి, మే 17: ఇంగ్లాండ్‌లో వచ్చేనెల ఒకటో తేదీ నుంచి ప్రారంభం కానున్న చాంపియన్స్ ట్రోఫీలో భారత కెప్టెన్ వినాట్ కోహ్లీ రాణిస్తాడని, ఆ సత్తా అతనికి ఉందని మాజీ కెప్టెన్ కపిల్ దేవ్ ధీమా వ్యక్తం చేశాడు. బుధవారం ఇక్కడ జరిగిన ఒక కార్యక్రమంలో పాల్గొన్న అతను పిటిఐకి ఇచ్చిన ఇంటర్వ్యూలో మాట్లాడుతూ, ఇండియన్ ప్రీమియర్ లీగ్ (ఐపిఎల్)లో విఫలమైనంత మాత్రాన కోహ్లీ ప్రతిభను తక్కువ అంచనా వేయడానికి వీల్లేదన్నాడు.

ముంబయి, మే 17: భారత దేశంలో ఫుట్‌బాల్‌కు ఆదరణ పెరుగుతున్నదని స్పెయిన్ మాజీ క్రీడాకారుడు కార్లెస్ పయోల్ అన్నాడు. అంధేరీలోని ముంబయి ఫుట్‌బాల్ ఎరెనాలో అతను సుమారు 500 మంది పిల్లలతో కలిసి ఆడాడు. వారి నైపుణ్యాన్ని తిలకించారు. అనంతరం అతను మాట్లాడుతూ భారత్‌లో ప్రతిభావంతులు చాలా మంది ఉన్నారని, సాకర్ పట్ల ఎక్కువ మంది ఆకర్షితులవుతున్నారని అన్నాడు.

ప్యూకెకొ (న్యూజిలాండ్), మే 17: భారత హాకీ క్రీడాకారిణి సునీత లాక్ర సెంచరీ పూర్తి చేసింది. న్యూజిలాండ్‌తో జరుగుతున్న ఐదు మ్యాచ్‌ల ఇరీస్‌లో భాగంగా బుధవారం నాటి మూడో మ్యాచ్ ఆమెకు కెరీర్‌లో వందోది కావడం విశేషం. కెరీర్‌లో వంద లేదా అంతకంటే ఎక్కువ అంతర్జాతీయ మ్యాచ్‌లు ఆడిన క్రీడాకారిణుల జాబితాలో చోటు సంపాదించింది. ఒడిశాలో జన్మించిన సునీత 2009లో అంతర్జాతీయ మ్యాచ్‌ల్లో అరంగేట్రం చేసింది.

ముంబయి, మే 16: హాట్ ఫేవరిట్‌గా బరిలోకి దిగిన ముంబయి ఇండియన్స్ అనూహ్యంగా ఓటమిపాలుకాగా, పదో ఇండియన్ ప్రీమియర్ లీగ్ (ఐపిఎల్)లో ఎలాంటి అంచనాలు లేకుండా అడుగుపెట్టిన రైజింగ్ పుణే సూపర్‌జెయింట్ మంగళవారం నాటి మొదటి క్వాలియఫయర్‌లో విజయభేరి మోగించి ఫైనల్‌కు దూసుకెళ్లింది. పాయింట్ల పట్టికలో అగ్రస్థానాన్ని ఆక్రమించిన కారణంగా ముంబయికి ఫైనల్ చేరేందుకు మరో అవకాశం ఉంది.