రియో డి జెనీరో, జూలై 29: అనుకున్న సమయంలో పనులు పూర్తికాకపోవడం వల్ల పలు సమస్యలు తలెత్తుతున్నాయని రియో డి జెనీరో మేయర్ ఎడ్యుయార్డో పేస్ అంగీకరించాడు. అసౌకర్యానికి క్షమించాలని వివిధ దేశాల నుంచి ఇప్పటికే ఒలింపిక్ క్రీడాగ్రామానికి చేరుకున్న అథ్లెట్లకు విజ్ఞప్తి చేశాడు. ఆర్థిక మాంద్యం, రాజకీయ అనిశ్చితి వంటి పలు కారణాలతో రియో ఒలింపిక్స్ కేంద్రాల్లో చేపట్టిన పలు పనుల్లో జాప్యం జరుగుతోంది.

సిడ్నీ, జూలై 29: ప్రపంచ మహిళల అథ్లెటిక్స్‌లో తిరుగులేని ఆధిపత్యాన్ని కనబరచిన ఆస్ట్రేలియా మేటి హర్డిల్స్ రన్నర్ శాలీ పియర్స్ రియో ఒలింపిక్స్‌కు దూరమైంది. చేతి మణికట్టు గాయంతో బాధపడుతున్న ఆమె పూర్తిగా కోలుకోక ముందే కండరాలు చిట్లడంతో ఒలింపిక్స్‌లో పాల్గొనడం లేదని ప్రకటించింది.

కింగ్‌స్టన్, జూలై 29: వెస్టిండీస్‌తో జరిగిన మొదటి టెస్టులో ఇన్నింగ్స్ విజయాన్ని నమోదు చేసిన భారత క్రికెట్ జట్టులో శనివారం నుంచి మొదలయ్యే రెండో టెస్టులో విజయమే లక్ష్యంగా బరిలోకి దిగనుంది. అన్ని విభాగాల్లోనూ భారత జట్టు పటిష్టంగా కనిపిస్తున్నది. విండీస్ అందుకు భిన్నంగా దారుణంగా విఫలమవుతున్నది. అటు బౌలింగ్‌లోగానీ, ఇటు బ్యాటింగ్‌లోగానీ ఆ జట్టు రాణించలేకపోతున్నది.

న్యూఢిల్లీ, జూలై 28: డోపింగ్ పరీక్షలో విఫలమైన రెజ్లర్ నర్సింగ్ పంచమ్ యాదవ్ కేసులో ఇరు వర్గాల వాదనలు విన్న జాతీయ డోపింగ్ నిరోధక విభాగం (నాడా) క్రమశిక్షణ కమిటీ తన తీర్పును వాయిదా వేసింది. శనివారం లేదా సోమవారం తీర్పు వెలువడే అవకాశాలు ఉన్నట్టు సమాచారం. 74 కిలోల విభాగంలో భారత్ నుంచి ఒకరికి రియో ఒలింపిక్స్‌లో పాల్గొనే అవకాశం ఉన్న విషయం తెలిసిందే.