నెల్సన్ (న్యూజిలాండ్), జనవరి 2: శ్రీలంక, న్యూజిలాండ్ జట్ల మధ్య శనివారం జరగాల్సిన నాలుగో వన్డే వర్షం కారణంగా రద్దయింది. శుక్రవారం రాత్రి కురిసిన వర్షంతో మైదానం బురదమయంకాగా, ఆట ఆలస్యంగా ఆరంభమైంది. దీనితో దీనిని 24 ఓవర్ల మ్యాచ్‌గా కుదించారు. అయితే, ఆటలో కేవలం తొమ్మిది ఓవర్లు మాత్రమే బౌల్‌కాగా, ఆతర్వాత భారీ వర్షం కురిసింది. దీనితో ఆటను నిలిపివేశారు.

కొలంబో, జవరి 1: శ్రీలంక క్రికెటర్లు కుశాల్ జనిత్ పెరీరా, రంగన్ హెరత్‌లను ఒక బుకీ సప్రదించాడంటూ వచ్చిన ఆరోపణలపై జరుగుతున్న దర్యాప్తులో ఒక ప్రాక్టీస్ నెట్‌బౌలర్ అనుమానితుడుగా ఉన్నట్లు శ్రీలంక క్రీడల శాఖ మంత్రి దయాసిరి జయశేకర శుక్రవారం చెప్పాడు. అతనిపై ఆర్థిక నేరాల దర్యాప్తు విభాగం(ఎఫ్‌సిడిఐ) వద్ద తాము ఫిర్యాదు చేయనున్నట్లు జయశేకర విలేఖరులకు చెప్పాడు.

న్యూఢిల్లీ, జనవరి 1: ప్రతిష్టాత్మకమైన సయ్యద్ ముస్తాక్ అలీ నేషనల్ ట్వంటీ-20 క్రికెట్ టోర్నమెంట్ శనివారం నుంచి ప్రారంభం కానుంది. దేశంలోని నాలుగు వేర్వేరు నగరాల్లో జరిగే ఈ టోర్నీ త్వరలో ఆస్ట్రేలియాలో జరిగే ట్వంటీ-20 సిరీస్‌లో పాల్గొనబోతున్న యువరాజ్ సింగ్, హర్భజన్ సింగ్, ఆశిష్ నెహ్రా వంటి సీనియర్ ఆటగాళ్లు తమ ప్రతిభను నిరూపించుకునేందుకు చక్కటి అవకాశాన్ని కల్పించనుంది.

తిరువనంతపురం, డిసెంబర్ 31: భారత జట్టు శాఫ్ కప్ ఫుట్‌బాల్ చాంపియన్‌షిప్‌లో ఫైనల్‌కు దూసుకెళ్లింది. గురువారం జరిగిన రెండో సెమీ ఫైనల్‌లో ఈ జట్టు మాల్దీవ్స్‌ను 3-2 తేడాతో ఓడించింది. జేజె లాల్పెక్లువా అత్యంత కీలకమైన రెండు గోల్స్ చేసి భారత్‌ను గెలిపించాడు. మ్యాచ్ 25వ నిమిషంలో కెప్టెన్ సునీల్ చత్రీ ద్వారా భారత్‌కు తొలి గోల్ లభించింది. 34వ నిమిషంలో జేజె చేసిన గోల్‌తో భారత్ 2-0 ఆధిక్యాన్ని అందుకుంది.