విజయవాడ, ఏప్రిల్ 2: రాష్ట్రంలో నిరుద్యోగులకు శుభవార్త. అన్ని ప్రభుత్వ శాఖల్లో సుమారు 20 వేల పోస్టుల భర్తీకి రాష్ట్ర క్యాబినెట్ ఆమోదం తెలిపింది. వీటిని ఒక సంవత్సరంలోగా భర్తీ చేయాలని నిర్ణయించారు. దీనికి సంబంధించి త్వరలోనే నోటిఫికేషన్ జారీ చేయాలని మంత్రివర్గ సమావేశం నిర్ణయించింది. రాష్ట్ర క్యాబినెట్ సమావేశం శనివారం స్థానిక ముఖ్యమంత్రి కార్యాలయంలో జరిగింది.

న్యూఢిల్లీ, ఏప్రిల్ 2: ఆంధ్రప్రదేశ్‌లో చేపట్టిన పోలవరం ప్రాజెక్టు నిర్మాణం గడువు పొడిగించేందుకు కేంద్రం సుముఖంగా ఉంది. దీన్ని జాతీయ ప్రాజెక్టుగా కేంద్రం ఇప్పటికే గుర్తించి కొంతమేరకు నిధులు కేటాయిస్తోంది. ఈ ప్రాజెక్టు నిర్మాణ పనుల తీరును సమీక్షించేందుకు ఎపి ముఖ్యమంత్రి చంద్రబాబు నాయుడిని ఇక్కడికి ఆహ్వానిస్తున్నట్లు కేంద్ర జల వనరుల శాఖ మంత్రి ఉమా భారతి శనివారం విలేఖరులకు తెలిపారు.

విజయవాడ, ఏప్రిల్ 2: రాష్ట్రంలోని నగర పాలక సంస్థలు, మున్సిపాలిటీలకు ప్రత్యక్ష పద్ధతిలో ఎన్నికలు నిర్వహించాలని ప్రభుత్వం నిర్ణయించింది. రాష్ట్రంలోని విశాఖపట్నం, తిరుపతి, కాకినాడ తదితర నగర పాలక సంస్థలు, వివిధ మున్సిపాలిటీలకు చాలాకాలంగా ఎన్నికలు జరగలేదు. వీటన్నింటికీ జూన్, జూలై నెలల్లో ఎన్నికలు నిర్వహించేందుకు ప్రభుత్వం కసరత్తు ప్రారంభించింది.

హైదరాబాద్, ఏప్రిల్ 2: ఉమ్మడి ఆంధ్రప్రదేశ్ విభజన సందర్భంగా భద్రాచలం రెవెన్యూ గ్రామం ఆనుకుని, ఆంధ్రలో విలీనమైన నాలుగు పంచాయితీ గ్రామాలను మళ్లీ తెలంగాణలో విలీనం చేసే విషయమై రెండు రాష్ట్రాల్లో వాతావరణం వేడెక్కింది. సిఎం చంద్రబాబుతో ఈ నాలుగు గ్రామాల గురించి మాట్లాడితే, ఇచ్చేందుకు అంగీకరించారని సిఎం కె చంద్రశేఖరరావు నెల రోజుల వ్యవధిలో రెండు సార్లు ప్రకటన చేశారు.