విజయవాడ, ఫిబ్రవరి 14: రాష్ట్ర రాజధాని అమరావతిలో తాత్కాలిక సచివాలయం నిర్మాణంపై సందిగ్ధత ఏర్పడింది. చదరపు అడుగుకు 3వేల రూపాయల ధరను ప్రభుత్వం నిర్ణయించగా టెక్నికల్ బిడ్‌లో ఆమోదం పొందిన ఎల్ అండ్ టి, షాపూర్జీ పల్లోంజీ కంపెనీలు 3,500 రూపాయలు పైగా ధరను కోట్ చేయడంతో టెండర్లను ఖరారు చేయకుండా ప్రభుత్వం పెండింగ్‌లో ఉంచింది.

వింజమూరు/దుత్తలూరు/వరికుంటపాడు, ఫిబ్రవరి 14: నెల్లూరు జిల్లాలో పలుచోట్ల భూమి కంపించింది. వింజమూరు మండలంలోని చాకలికొండ, బత్తినవారిపల్లిలో ఆదివారం తెల్లవారుజామున ఐదు గంటల సమయంలో మూడు సెకన్లపాటు భూమి కంపించడంతో ఆయా గ్రామాల్లోని ప్రజలు పరుగులు తీశారు. గతంలో ఇదేవిధంగా పలు పర్యాయాలు భూమి కంపించడంతో ఆయా గ్రామాల ప్రజలు భయాందోళన చెందారు.

గుత్తి, ఫిబ్రవరి 14: అనంతపురం జిల్లా గుత్తి మండల పరిధిలోని చెర్లోపల్లి గ్రామ పంచాయతీలో వెలసిన శ్రీశ్రీశ్రీ సంత్‌సేవాలాల్ మహరాజ్ 277వ జయంత్యుత్సవాలు ఆదివారం ఘనంగా ప్రారంభమయ్యాయి. ఈ ఉత్సవాలకు ఆంధ్రప్రదేశ్, కర్నాటక, తమిళనాడు, మహారాష్ట్ర, తెలంగాణ తదితర రాష్ట్రాల నుంచి భక్తులు అధిక సంఖ్యలో తరలివచ్చారు. సేవాలాల్ జయంత్యుత్సవాలను ఆలయ కమిటీ నిర్వాహకులు బోగ్ కార్యక్రమంతో ప్రారంభించారు.

నాగార్జునసాగర్, ఫిబ్రవరి 14: నాగార్జునసాగర్ జలాశయం నుండి కృష్ణాడెల్టాకు సాగర్‌లోని ప్రధాన జల విద్యుత్ ఉత్పత్తి కేంద్రం ద్వారా విడుదల చేస్తున్న నీటిని సోమవారంతో నిలిపివేయనున్నారు. శ్రీశైల జలాశయం నుండి 11 టిఎంసిల నీటిని సాగర్ జలాశయంకు శ్రీశైలంలో విద్యుత్ ఉత్పత్తి చేసుకుంటూ విడుదల చేస్తున్నారు. గత పదిరోజులుగా శ్రీశైలం నుండి సాగర్‌కు వస్తున్న నీరు ఆదివారంతో తగ్గుముఖం పట్టింది.