భీమవరం, నవంబర్ 20: తుపాన్ల వంటి ప్రకృతి వైపరీత్యాలను దృష్టిలో ఉంచుకుని వచ్చే సీజను నుండి ఖరీఫ్ పంట నవంబర్ నాటికి రైతు ఇంటికి చేరేలా ప్రణాళికలు సిద్ధం చేస్తామని రాష్ట్ర వ్యవసాయ శాఖ మంత్రి ప్రత్తిపాటి పుల్లారావు తెలిపారు. నవంబర్, డిసెంబర్ మాసాల్లో తుపాన్ల ప్రభావం ఎక్కువగా ఉంటున్నందున అంతకంటే ముందుగానే పంట చేతికందేలా వ్యవసాయ ప్రణాళిక రూపొందిస్తామన్నారు.

విశాఖపట్నం, నవంబర్ 20: బీమాను అన్ని రంగాలకు విస్తరింపజేయాలని రాష్ట్ర హోం మంత్రి చినరాజప్ప బీమా కంపెనీలను కోరారు. ప్రస్తుతం కొన్ని రంగాలకు మాత్రమే బీమాను వర్తింపజేయడంతో ప్రజలు ఎక్కువగా నష్టపోతున్నారన్నారు. బీమాపై ప్రజలకు మరింత అవగాహన కల్పించాలన్నారు.

హైదరాబాద్, నవంబర్ 20: హైదరాబాద్ వేదికగా వారం రోజులుగా జరిగిన 19వ అంతర్జాతీయ బాలల చలన చిత్రోత్సవం ముగింపుకార్యక్రమం ఆర్భాటంగా జరిగింది. వివిధ ప్రాంతాల నుంచి వచ్చిన బాలబాలికలు ప్రదర్శించిన నృత్యాలు అలరించాయి. బాలబాలికల ప్రదర్శనలు, వివిధ ప్రాంతాలు, సంస్కృతీ సంప్రదాయాలను తెలియజేస్తూ చేసిన ప్రదర్శనలతో శిల్పకళావేదిక ఆడిటోరియం శుక్రవారం బాలల కేరింతలతో దద్దరిల్లింది.

తిరుపతి, నవంబర్ 20: చిత్తూరు మేయర్ అనూరాధ దంపతుల హత్య కేసులో ప్రధాన నిందితులు చింటూ అలియాస్ చంద్రశేఖర్, రెడ్డి అలియాస్ జయప్రకాష్, వెంకటేష్‌ల ఆచూకి తెలిపిన వారికి లక్ష రూపాయలు బహుమానం ఇస్తామని, సమాచారం ఇచ్చిన వారి పేర్లను రహస్యంగా ఉంచుతామని రాయలసీమ అడిషనల్ డిజి ఠాకూర్ ప్రకటించారు. మేయర్ దంపతుల హత్య కేసు దర్యాప్తు పురోగతిని పరిశీలించడానికి శుక్రవారం ఉదయం ఆయన చిత్తూరుకు చేరుకున్నారు.