శ్రీకాకుళం: జిల్లాలోని సంతబొమ్మాలి వద్ద సముద్రతీరంలో పడవ బోల్తా పడింది. ఈ ఘటనలో ముగ్గురు మత్స్యకారులు ఒడ్డుకు చేరుకున్నారు. మరికొంతమంది గల్లంతయ్యారు. ఉమిలాడ తీరంలో ఈ ఘటన చోటుచేసుకుంది. ఈ ఘటనపై ముఖ్యమంత్రి చంద్రబాబునాయుడు ఆరా తీశారు. గల్లంతయిన వారికోసం గాలింపు చర్యలు చేపట్టాలని కోరారు.

విజయవాడ: తెలుగుదేశం పార్టీపై మరోసారి జనసేన అధినేత మండిపడ్డారు. అవిశ్వాస తీర్మానంపై లోకసభలో నిన్న వివిధ పార్టీలు వ్యక్తంచేసిన అభిప్రాయాలను తెలియజేస్తూ ఆయన ట్విట్టర్‌లో స్పందించారు. ప్రత్యేక హోదాను నీరుగార్చింది ఎవరు అని ప్రశ్నించారు. టీడీపీ ఒక్కసారి గతాన్ని గుర్తుచేసుకోవాలని అన్నారు. మీరు మాట్లాడే ప్రతి మాట, ప్రతి చర్య ఐదుకోట్ల మంది ప్రజలకు జవాబుదారితనంగా ఉండాలని అన్నారు.

అమరావతి, జూలై 20: కేంద్రం మాటల్లో నిజాయితీలేదు.. రాష్ట్రానికి ఏంచేశారో పునస్సమీక్ష జరిపినట్లులేదు.. పాతపాటే పాడుతున్నారు.. వాస్తవాలు చెప్పేవరకు వదలొద్దని పార్టీ ఎంపీలకు ముఖ్యమంత్రి, తెలుగుదేశం పార్టీ అధినేత చంద్రబాబునాయుడు స్పష్టం చేశారు. శుక్రవారం కేంద్రంపై అవిశ్వాసం సందర్భంగా విభజన అంశాలన్నింటినీ లోక్‌సభలో ప్రస్తావించిన గుంటూరు ఎంపీ గల్లా జయదేవ్‌ను అభినందించారు.

అమరావతి, జూలై 20: కేంద్రంలోని ఎన్డీయే ప్రభుత్వంపై తెలుగుదేశం పార్టీ అవిశ్వాస తీర్మానంపై చర్చ సందర్భంగా రాష్టమ్రంతటా ఉత్కంఠ నెలకొంది. విభజన అంశాల అమలులో కేంద్ర తీరుకు నిరసనగా ప్రవేశపెట్టిన అవిశ్వాస తీర్మానం సందర్భంగా ఎంపీల ప్రసంగాలు.. రాష్ట్ర ప్రయోజనాలు రాజకీయ పార్టీల్లో చర్చనీయాంశంగా మారాయి. మరోవైపు రాష్ట్రానికి ప్రత్యేకహోదా తదితర అంశాలపై కేంద్రం నుంచి స్పష్టత వస్తుందనే భావన ప్రజల్లో నెలకొంది.