హైదరాబాద్: దేశంలో బీజేపీని ఓడించే దిశగా పొత్తులు ఉంటాయని సిపిఐ నేత సురవరం సుధాకర్‌రెడ్డి అన్నారు. ఆయన మంగళవారంనాడు మీడియాతో మాట్లాడుతూ కేరళలో జరిగిన సిపిఐ జాతీయ మహాసభలు విజయవంతమయ్యాయని అన్నారు. బీజేపీ, టీఆర్‌ఎస్‌కు వ్యతిరేకంగా వేదిక ఏర్పాటుకు సీపీఐ ప్రయత్నిస్తుందని చెప్పారు. తెలంగాణ జన సమితితో పనిచేసే అవకాశం ఉందని అన్నారు.

కృష్ణా: వైకాపా అధినేత వైఎస్ జగన్ చేస్తున్న పాదయాత్ర 150వ రోజుకు చేరుకుంది. మంగళవారం ఉదయం గూడూరు మండలం పర్ణశాల నుంచి జగన్‌ పాదయాత్రను ప్రారంభించారు. రామరాజుపాలెం క్రాస్‌ మీదుగా మచిలీపట్నం వరకు యాత్ర సాగనుంది. సాయంత్రం మచిలీపట్నంలో ఏర్పాటు చేసిన బహిరంగసభలో జగన్ ప్రసంగించనున్నారు.

విజయనగరం : ఉత్తరాంధ్ర జిల్లాలలోని పార్వతీపురం, కురుపాం, గజపతినగరం ప్రాంతాల్లో మంగళవారం ఉదయం ఉరుములు, మెరుపులతో కూడిన భారీ వర్షం కురుస్తోంది. శ్రీకాకుళం జిల్లాలో ఇచ్చాపురం, పలాస, ఆముదాలవలస, శ్రీకాకుళంలో వర్షాలు పడుతున్నాయి. విజయనగరం జిల్లాలోనూ పలు చోట్ల వర్షాలు కురుస్తున్నాయి. పార్వతీపురం, బొబ్బిలిపట్టణాల్లో ఈదురుగాలులు వీస్తున్నాయి. భారీ వర్షం పడుతోంది.

కరీంనగర్ : జిల్లాలోని కేశవపట్నంలో అనుమానాస్పదస్థితిలోదంపతులు మృతి చెందారు. భార్య ధనలక్ష్మిని భర్త గొడ్డలితో నరికి చంపినట్లు స్థానికులు అనుమానం వ్యక్తం చేస్తున్నారు. భార్య హత్య అనంతరం భర్త పురుగుల మందు తాగి ఆత్మహత్య చేసుకున్నాడు. పోలీసులు కేసు నమోదు చేసుకొని దర్యాప్తు చేపట్టారు.