హైదరాబాద్, అక్టోబర్ 2: జాతిపిత మహాత్మాగాంధీ జయంతి ఉత్సవాన్ని తెలంగాణ రాష్ట్ర వ్యాప్తంగా సోమవారం అధికారికంగా ఘనంగా నిర్వహించారు. రాష్ట్ర ప్రభుత్వం ఇటీవలే గాంధీ జయంతిని రాష్ట్ర పండగగా గుర్తిస్తూ, జీఓ జారీ చేసింది. దాంతో రాష్ట్ర రాజధానితో పాటు జిల్లాల్లో కూడా గాంధీ జయంతి వేడుకలు ఘనంగా జరిగాయి. కేంద్ర, రాష్ట్ర ప్రభుత్వ కార్యాలయాలకు, విద్యాసంస్థలకు సెలవు ఇచ్చారు.

హైదరాబాద్, అక్టోబర్ 2: గాంధీ జయంతి సందర్భంగా రాష్ట్ర ప్రభుత్వం ఒక్క పత్రికా ప్రకటన ఇవ్వకపోవడం విచారకరమని ఎఐసిసి నాయకుడు, మాజీ ఎంపి వి. హనుమంత రావు విమర్శించారు. అవినీతి నిర్మూలనపై ముఖ్యమంత్రి కె. చంద్రశేఖర్ రావు చెప్పే మాటలన్నీ నీటి మూటలేనని ఆయన సోమవారం విలేఖరుల సమావేశంలో మాట్లాడుతూ అన్నారు.

హైదరాబాద్, అక్టోబర్ 2: భారత కమ్యూనిస్టు పార్టీ (మార్కిస్ట్) తెలంగాణ రాష్ట్ర కార్యదర్శి వర్గ సమావేశం ఈ నెల 3న, రాష్ట్ర కమిటీ సమావేశం 4,5 తేదీల్లో హైదరాబాద్‌లో జరుగుతుందని ఆ పార్టీ ఒక ప్రకటనలో తెలిపింది. పార్టీ పోలిట్‌బ్యూరో సభ్యుడు బివి రాఘవులు ఈ సమావేశాలకు హాజరవుతున్నట్లు స్పష్టం చేసింది.

హైదరాబాద్, అక్టోబర్ 2: హైదరాబాద్ పాతబస్తీలో ఇటీవల జరిగిన కాంట్రాక్టు పెళ్లిళ్ల కేసులో పోలీసులు పురోగతి సాధించారు. చాంద్రాయణగుట్ట ప్రాంతంలో వారం రోజుల క్రితం ఉమన్, సౌదీ అరేబియా షేకులకు మైనార్టీ బాలికలతో వివాహం జరిపించిన నలుగురు బ్రోకర్లు, ఇద్దరు ఖాజీలు, ఎనిమిది మంది విదేశీయులను పోలీసులు అరెస్టు చేసిన విషయం తెలిసిందే.